Wed06282017

Last update06:26:30 PM GMT

Font Size

Profile

Menu Style

Cpanel

Murunʒxepeşen Moxtimeri

  • PDF

murutsxepesenmoxtimeriİptineri, oşkande do lise ǯopxula iǩitxu Xopas. Magurelobas, maguralepek-ti oromt̆es ham bere. İpti muziğişi ç̌andinale mandolini dikaçu xes, oǩaçxe cumadimuşik na-yuç̌opu gitari, ğurut̆uşa gitari xeşen var met̆ǩoçu. Gitari do muziği, kultura do ǩoçinobaşi oropa hemuşi skidalaşi oxoǯona şeni var ivazna na-var iven steri armutu divu.

Murunʒxepeşen Moxtimeri, Guris Amaxtimeri: Kazim Koyuncu

Xopaşi oput̆e P̌anç̌olis dibadu Kazimi, ǯana 1971 rt̆u, mteli Lazonaşi berepe steri. Lazonaşi şuri şvanu, ǯǩarepe şvu, ntxirepunapes do çayluğepes garçet̆u beroba-muşiz. Bere rt̆u-na-ti, nosi musi steri berepeşen çkva muntxanepes uğut̆u. Ar mʒika ora şkule çkva ozmonoba na-uğun ar bere na-t̆u ordoşen koxiǯonu.

Na-žiru ǩat̆a sersi na-gamulun mutuşen muziǩaşi ç̌andinale ikomt̆u do hemuten istert̆u. Muziği dido oromt̆u, hemuǩala eiselt̆u, hemuǩala incirt̆u. Kemençeşe meraği Yaşar Turna şen naǩnu. Hem bere irdet̆uşi kultura-muşişi oropaşen, muziği do ǩoçinobaşi oropaten inkiminu. Ar mʒika irdudo daha dido ǩoçinobaşi çkinapa ezduşi, hamtepe şeni muntxanepe oxenu na-uǩorşi ozmonuşe gyoç̌ǩuşi, ǩoçinobaşi do kulturaşi oropa şeni birapape vu, hemtepe ibiru, irixolos-ti hem birapape obirapu.

İptineri, oşkande do lise ǯopxula iǩitxu Xopas. Magurelobas, maguralepek-ti oromt̆es ham bere. İpti muziğişi ç̌andinale mandolini dikaçu xes, oǩaçxe cumadimuşik na-yuç̌opu gitari, ğurut̆uşa gitari xeşen var met̆ǩoçu. Gitari do muziği, kultura do ǩoçinobaşi oropa hemuşi skidalaşi oxoǯona şeni var ivazna na-var iven steri armutu divu.

Lise doçodinu şkule mağala ǯopxula oǩitxu şeni Mp̌olişe igzalu. Mp̌olişe iduşi hekdido çkva ozmonaponi, çkva ǩoçepe içinu, hemtepeşi didope muziği ǩala na-iboden ǩoçepe rt̆u. Na-iǩitxomt̆u mağala ǯopxulaşen dido muziği do ǩoçinobaşi çkinapas yodgitu do haşopeten na-iǩitxomt̆u ǯopxula eǩit̆ǩoçu. Hek na içinapu mabira do maç̌andinalepe ǩala mteli muziği şeni oçalişus gyoç̌ǩu. Dido omǩitepe zdu-na-ti var metǩoçu dido na-oromt̆u muziğiz do birapaz. Haşopeten dido na-ioropinen mabira divu Kazimi, Lazonaşe murunʒxepeşen gextudort̆un. Lazonaşi, Lazepeşi sersi enni dido enni mskva na-ognapinams ǩoçepeşi ari rt̆u do ğurut̆uşakis haşo naonu.

Mp̌olis çkvado çkva muziğişi oǩoxtimapes içalişu. İptineri Lazi muziği na-ikomt̆u oǩoxtimale Zuğaşi Berepe ǩala Lazepeşi muziği vu, hak Lazuri-ti birapape vez. Çodinas enni dido na-içinet̆u oǩoxtima gedges do etniği muziği ves. Turkiyes do mteli sva-mogvales haşopeten Lazepeşi do hemtepeşi maltepeşi muziği ognapu. Kazimi xvala Lazepek vardo, Turkiyeşi mteli xalǩepek, sva-mogvaleşi xalkepeşi didopek-ti içinomt̆u do hemuşi birabapes uucamt̆u.

Kazimişi nena do muziği dido ǩai miǯont̆u do dido p̌oromt̆i. Hemuşi birapape na-var oroms miti-ti var t̆u. Kazimi na-içinapu steri xvala mabira ǩoçi vart̆u. Dido nosi moǯopxeri, tanura ǩoçinobaşe oroperi do gomta-oropale ǩoçi-ti rt̆u. Na-vu muziği xvala ucişi ognapa şeni var vu, muziğik ucişen çkva, gurişe do nosişe-ti mutu meçasen steri oxenu na-unt̆u açkinu do haşo muziğişi oxenuşe içalişu. Ma hak, Kazimişi muziğişen çkva ozmonu-muşi şeni muntxanepe otkvu minon.

Kazimi gomta-ogurale ǩoçi na-rt̆u şeni mteli haşo oǩoxtimalepes nuşvelu do na-ixent̆u ham dulyapes mxuci meçu.

“Artvini do Bergamas siyanurite oǩroşi ogoruşi p̌at̆inoba, Akkuyuz nukleri santrali, Gyokovas termiğişi santrali, Furt̆unaşi rubas ǯǩarişi santrali… yaşi haǯi dido oğune na-gyoç̌ǩu Samsunişen-Xopaşa Zuğaş ǩelaşi gzaşi projeşa. Ham projeşi goğramute ma-einʒinasen do var didginasna mteli na-yonʒinanoren zuğaşi-ǩelape çkuni do beroba-çkuni do na-moxtasen orape-çkuni do tarixi-çkuni do… skidala” Ma, haşo ar Zuğa-uçaşi gzaşi oǩoxtima-goladgitas bžiri do biçini Kazimi, goladgita-çkunişe oǩoxtimaşe mxuci meçamuşe moxtudort̆un. Zuğa uçaşi ǩelape kfaten na-oipşen var unont̆u, gomte-oropale ǩoçi na-rt̆u şeni çkunde gelaşvaluşe moxtudort̆un do hek zuğaşi ǩelapeşi kfate opşuten zuğaşi p̌icepe na- yonʒinanoren oxoǯonapu hek na-moxtespeşe. Hem oras na-vu gelaşvalate çkun dido moxelezdort̆un, Kazimik.

“Çkar ti çkunişen udoǩlu na-var doskidun nʒaşe, ndğaşi mǯǩupi saatepeşe, kimi oras baras-na-ti ixepeşe, ar ndğas na-bişkidaten zuğapeşe, mcveşi ndğalepeşe, muperepe ivasen var miçkinan-na-ti na-moxtasen orapeşe, p̌at̆inobate opşa t̆as-na-ti tarixişe, tarixi golalapinuşi oisanuşe na-içalişams mteli mskva nuǩoni berepeşe, Donǩişotepeşe, daçxurişi maxiralepeşe, Ernesto “Ç̌E” Guevaraşe, gzas magzalepeşe, oroperepeşe, na-ioropenpeşe, xvala na-biozmonamt na-var ivenpeşe, ini mavanşi ot̆ubinupeşe, irişen t̆uʒa nanapeşe, babapeşe do nostoni mteli hamtepeşen na-ezdims birapaşe çkuni t̆uʒanobape buncğonamt. P̌at̆i muntxanepe bžirit, oǩoǩedinupe, ǩoçişi oğurinupe na-ğurun, na-iğurinen berepe bžirit. Nenamuşi, kulturamuşi, timuşi na-gondinoms ǩoçepe, oǩoxtimalepe bžirit. na-iç̌ven oput̆epe, noğape, germape, çxovarepe bzirit. Umogapale ǩoçepe, na-ibgars nanape, babape, ǩat̆a ndğas çkina çkineri gzapes oğuruşe na darçen tinerci berepe bžiri. Çkunti bğurit. Edo iri mutuşe ǩele ham sva-p̌icis birabape bibirit. Mardi goğodam sva-mogvale. ”Haşoten, mardi na-oğodu sva-mogvaleşen igzalu Kazimi ordoşen. Kazimi igzalu-na-ti oropa do birapa muşi skidasen sva-p̌icişi ǩat̆a sotiz çodina na-var ren orapeşeşa. Enni ǩai do omraluri na-rt̆u ar oraz, Lazepes do Lazonas na-unont̆u ar oraz, Çernobişi genoskidak hemuti meç̌opudo ordo do na-var nomskun ar oraz gombdinit do nʒaşa kextu. Var minont̆an-na-ti Kazimik ordo memaşkvez edo na-vu dulya; Lazi kultura do nena şeni dido oraşen doni oxenu na-uǩorst̆u ar dulya rt̆u. Lazuri nena do kultura xvala Lazepes vardo mteli Turkiyes, Sva-mogvaleşe oçinapuşe, oropinuşe içalişu do daxenuti…


Didi mardi Kazim…

Murunʒxepeşen moxti, murunʒxepeşe igzali-na-ti, guri-çkunis re.

 

Osman Şafak Buyuǩlişi

Son Güncelleme: Perşembe, 12 Nisan 2012 05:28

Helimişi XASANİ

Helimisi
Lazcanın Evrensel Şairi

Coxope

Coxope
Çocuklara Lazca İsim

93 Harbi

93 Harbi
Muhacir Lazlar

Arkeopolis

Arkeopolis
Lazika'nın Başşehri

Lazca Açıköğretim

Lazca Açıköğretim
Açıköğretim Başlıyor