Fri10202017

Last update06:26:30 PM GMT

Font Size

Profile

Menu Style

Cpanel

Ham ğura var on, meğura on!

  • PDF

kazimSǩudu. Gzalepes kuşǩuran muç̌eşi na-sǩudu. Ot̆rağodupes, birabapes kuşǩuran. Berepes do cencepes kuşǩuran. Guri-nişis ǩap̌ula na-nuçamaput̆u berepes. Himuşi him memsǩvaneri nena do ot̆rağodupe-muşi na-niyucamt̆es cencepes. Kuşǩuran. E do him igzalu do let̆a icibalu. Onape, zuğape, nʒalepe şǩu psǩudi!


Ombri ncalepes uǩitxit, giǯvanene

Murunʒxepes uǩitxit

Psǩudi!

Na voxuzdi xepepeşǩimis uǩitxit

Psǩudi!
Vigzali gzalepe do ot̆rağodupes uǩitxit sǩudu. Gzalepes kuşǩuran muç̌eşi na-sǩudu. Ot̆rağodupes, birabapes kuşǩuran. Berepes do cencepes kuşǩuran. Guri-nişis ǩap̌ula na-nuçamaput̆u berepes. Himuşi him memsǩvaneri nena do ot̆rağodupe-muşi na-niyucamt̆es cencepes. Kuşǩuran. E do him igzalu do let̆a icibalu. Onape, zuğape, nʒalepe şǩu memit̆omales do igzalu. Purkinorape, monç̌inorape, inuvape… Mut’on ǩinçepe, nçxomepe, ǩat̆upe… Ot̆rağodupe, nenape, gzalepe, novelepe şǩu memit̆omales do igzalu. Uçazuğaşi him ǯari st̆eri bere eni na-domaç̌it̆es oras ceju xepe-şǩunişe. Vamaç̌op̌es. Ǩinçepe şuǩu yengliğon, ǩinçepe-st̆eri jums idu svalepes. Dirinu do na-imordu let̆a-muşişe, Xop̌e-şe cevojulinit.

Uşǩut̆u-i-çi naǩu oropa delemižut̆es guris, himus na-vuşinaxamt̆it? Ǩonserepes gamayoxinu-şeni muyaperi nenape evuzdamt̆it? Himuk eyomogutan do him msǩva nena-muşite mit̆rağodamt̆anşa şǩu guri muyaperi amamalanet̆u, çemane do gudate meyovolatet̆u. Art̆ikat̆işi xepes vaǩnat do irağorda cevixoronatet̆u.

Var iyu. Momoğordines do igzalu. Cumalepe-şǩimi na-uǯomert̆u berepe, şǩaşa çilambri naşǩu do igzalu.

Him toli-şǩuni oği na-jumt̆u a parpali st̆eri ort̆u. Parpalepe naǩu nuxonduran, kogişǩuran. Himuk, şuri na-nupatxu ndğaşa dulya va naşǩu. Hişoşi pelaperi ort̆u. İgzalu do Uçazuğa, ot̆rağodupe, birabape umiteli naşǩu. Himu şǩala ar nʒaşi tude var vort̆at aşǩva. Beyoğlis, İstiklalis mxucepes na-eyipinamt̆u tomalepe do ǩlançxums tolepete ar daha oği-şǩuni aşǩva varto colas-i? ‘Aşǩva şǩuni şeni haminepe-ti dobadona diyu na-it̆ut̆u Taksimişi gunže gzalepes varto cegutas-i? Him gzalepes nena-muşi xvala iǯingilasere-i? Mutite na-var ijginen guri-muşi arti.

Mç̌ipe do gune, him msǩva bere-şǩuni dirinu svalepe-muşis on aşǩva, hikoni ixepe nobarasere xayarepes. Mp̌olis na-dvanç̌inuşi xayifi hik gamiğasere. Va mevazmonat. Hik opşa vorsi ort̆asere, komişǩuran. Şǩu idu ya do va macereran. T̆ǩva-ti mo icert!

Noti: Ham nç̌ara, Kazimi na-miğures ndğalepes inç̌arudon.

Filiz ACAR

Son Güncelleme: Salı, 10 Nisan 2012 09:16

Helimişi XASANİ

Helimisi
Lazcanın Evrensel Şairi

Coxope

Coxope
Çocuklara Lazca İsim

93 Harbi

93 Harbi
Muhacir Lazlar

Arkeopolis

Arkeopolis
Lazika'nın Başşehri

Lazca Açıköğretim

Lazca Açıköğretim
Açıköğretim Başlıyor