Fri10202017

Last update06:26:30 PM GMT

Font Size

Profile

Menu Style

Cpanel

Mjoras na-nodiʒams piʒari oxorepeşi ust̆a: Cemil Dayi

  • PDF

mjorasnoditsamsÇoyişe idatis, Murut̆i aviyaşe golulut̆atşa gza ç̌iladis na-elasvarun dişǩapes vorsi goǯerit. Ǩat̆a ǩale mjora medvas do kakalaç̌i st̆eri xomas ya do na-cosvaru ç̌arma žiratere. Hindos gogaşinan-çi ham Cemil dayişi dulya’n. Himu st̆eri dişǩa mis casvaren? Dulya mis axenen? Hiǩu mest̆uresayeri...

“Serende muti on ç̌ubri on”

Ǩoçepe oran. Pot̆e badi va iyeran, ancaği itişineran. Naǩu ǯana golaxt̆asere golaxt̆as muç̌e mevaşǩvit hişo bžiremt. Cemil dayis na-noǯeraserek haşo iduşunams, haşo it̆us. Ma-ti vidisis ‘Cemil dayi, miti toli moto gaǩnas, opşa vorsi gžiri’ ma vuʒhvi a komoydiʒinu do “Ma berenobaşe beri haşo vore ǩizum” ya miǯu.

Oxaparu cevoç̌it̆is pʒadi-çi asǩerişe idusis ǩomutani-muşiǩ-ti –daha ǯari st̆eri, yeni yetme deliǩanli ot̆uşa- a noʒadu. ‘Ham bere opşa narin on, monǩa dulyape mo oxinapamt̆ ya do dutembiğu onbaşipes. Demek-çi ǩat̆a ǩale gamiǩaten. Ot̆as, himus dulyaşe toli va uşǩurdu. Opşa pelaperi ot̆u. Dunyas eni çetini dulyape komoysvaru. Piǯari oxorepe, serendepe, karmat̆epe ǯopxu xepepe-muşite. Haǩute dibağut̆uǩo vorsi... Uǩaye eç̌opu dudi-muşi do gurbet̆işe ǩoyt̆oçu. İdu svalepes-ti divi st̆eri santralepe do fabriǩape kododgu. Emeǩli iyu do çoyişe goytusis-ti soti ǩale va iǩaçu. Elan daha paʒxalams, axenenşi ikums.


Çoyişe idatis, Murut̆i aviyaşe golulut̆atşa gza ç̌iladis na-elasvarun dişǩapes vorsi goǯerit. Ǩat̆a ǩale mjora medvas do kakalaç̌i st̆eri xomas ya do na-cosvaru ç̌arma žiratere. Hindos gogaşinan-çi ham Cemil dayişi dulya’n. Himu st̆eri dişǩa mis casvaren? Dulya mis axenen? Hiǩu mest̆uresayeri...

Cemil dayi, mişǩunçi si galepes opşa gogilvapun. Hini ar-ti şǩimi şeni meyogasvaraset̆u-yi?
Ma 81 ǯaneri vore. 1927 iyen. Baynazepeşi Ayşe Bulak emǩozdu. Papu Ayşe uǯomet̆es. Mektebişe va milvapun. Şǩuni vaǩit̆is mektebi va ot̆u. Uǩaye-ti hişo kodosǩudu. Ece-şǩimik it̆ut̆u-çi “xepey sǩepali dvaǩaçusis ust̆aşi yanine komepçi.” Berenobaşe beri xepe dulya maxenet̆u, malimbet̆u. Enimt̆i daha Cabatis viçalişi (1944) Yegeni İbrahimiǯa-şǩala. Himuşuǩale Tordovatis. Eme Osma dayi, ma, Çerimi İbrahimi viçalişit. Uǩaye mutahit̆i (Selahattin Ozden) yanine dulyas kamaft̆i. Ust̆a gorumt̆u. Ma-ti ust̆a vot̆i. Noğa (Pazar-195ʒ) do Mapavres (Çayeli) isǩelepe dopit. Hikele Radarişe kogolaft̆it. Fransuzi, Alamani do İngilisi opşa firmapet̆es. Ma Fransuzepe-şǩala viçalişi jur ǯana. Hindora şuǩule Rizeşe kogolaft̆it. Oxorepe pit. Uǩaye Çutaxya T̆avşanli Tunçbileğis masumani termik santralis viçalişi a ǯana. Hikele Bandurmas Etibankişe vidit, vit̆oxut ǯana-ti hik fabriǩape pit. Boraks, asit, poborant, hidrojen, gaz fabriǩape do buhar santrali. Him gzaşe Bursa Uludağis Volfrang fabriǩasi. 1980’işi yazis emekli deviyi. Çoyişe kovigti. Maxenenşi vikum aşǩva.

Si muç̌e ust̆a iyi? Mişe diguri?
Berenobaşe beri a mutxape oǩoç̌adu xaži mayet̆u. Ust̆apek içalişamt̆eyşa mevifiçiramt̆i. Ma va viçinem, morderi emice-şǩimi (Must̆afa) ust̆at̆u. Seferbirluğis, Erzurumişe va mvalu. Baba-şǩimik-ti (Murut̆i Haǩǩi) ğuni moǯopxamt̆u. Put̆uci opşa alimbet̆u. Uǩaye nana-şǩimik çoyis, Yegeni İbrahimiǯas kelemixunu. A ǯana himu-şǩala goft̆i do muya muç̌e na-iyen kodeviguri.

İbrahim dayi opşa titiz ot̆u ramet̆li. Himuşǩla muç̌e oǩuveli?
Hişo uşǩuran. Ma himu-şǩala na-viçalişi st̆eri miti şǩala va miçalişapun. Opşa vorsi oǩovuvelit. Ma miǯomet̆upes uci mepçamt̆i, himus-ti ma opşa alimbet̆u. Bazi svalepes para va naçet̆es birden. Himuk gamiğamt̆u do şǩimi payi komomçamt̆u. Yegen, si beçi dogaç̌is ya do. Him soyi.

Si serende ust̆a ore. Naminepes giçalişapun?
Heee. (a komoydiʒinu) Serende xvala-i? İri tevuli mixinapun. Oxori, karmat̆e, yaşiği bile miç̌adapun. Ali dayidinik xižari şǩorumt̆es, şǩu-ti pç̌adumt̆it. 1944’işi ǯanas ar tane vit̆oxut ǩruşis ot̆u. Him do made Xunaris otxo xu tane piǯari karmate mixinapun. Memet̆ina karmate, Xasa karmat̆e, ar jur daha. Başǩa çoyepes-ti miçalişapun. Taa Xemşinepeşa milvapun. Moro.

Ust̆aluği na-ikumt̆it svalepes dogutut̆it-i vana ulut mulut̆it-i?
Mendra svalepes dobgutut̆it. Yaǩini on-na vulut movulut̆it. Radari vikumt̆itşa eşǩevulut cevulut̆it. Evela Xunarişe noğaşa ǩuçxete, uǩaye noğaşe Ǩoǩsovatişa arabate. Ee, ǩolayi va on. Pi dotanaşe moysela do gzay cegutare.

Cemil dayi, moxti sǩani-şǩala a serende kodobdgat...
Eyi, evela arguni moyovidvat do nca oǩvatuşe vidatere. Serende mut-on ç̌ubr-on. Ç̌ubri st̆eri na-nuxondun başka muti var on. Himus hiçi muti va ağoden. Hindos ç̌ubri opşun hanepes, ama ne gza on, ne-ti araba ceğmalaşe. Nca epǩvatiǩot şuǩale arape govuşǩoramt̆it. Dobyazamt̆it do makvali st̆eri kogamaviyonamt̆it, çoşeli. Morderepe otxo, daha ceǯulvape jur şurik gondveri kociğamt̆es. Hindos meci dixo hakele hik ǩuçxe va medgamt̆es. Koçepe meci ayiri, xoržalepe meci ayiri ikumt̆es. Hele oxori oǯopxus koǩipinet̆es. Carepe-ti koǩosvaramt̆es.

Huy xepepe govinžiǩat. Serende şeni na-pǩvatit otxo tane ç̌ubri ncate temeli dopǩorat. Otxo tane-ti direği, mçxu ncalepeşi. Boğazi. Hini-ti koǩopǩorat. Him direğepes otxo tane yan çalma komepçat. Otxo tene-ti parpa dopşǩorat, mtucis mo eyalas. Parpa mçxu ncalepeşe gamaviyonamt, ecere va eyinç̌as-na elevudgatere. Otxo daha parpa dudi keyevuç̌adat hinis. Jur-ti oşǩendaşe parpa dudi xolo. Otxo-ti perçe ncalepe. Tudeni ǩat̆i dovoçodinit.

Goyti hikele çoşe tere. Çoşepe-ti moǩovit̆oçat şuǩule jindo otxo nca keyobdvat. Himu şuǩale ǩamarape mepxvat. Ana covdeşi piʒarepe, him do ceri meteyizişi çoşepe gamapsvarat. Ar-ti otxo nca keyobdvat do art̆iǩat̆is kodolovoxunat. Hus-ti ‘sarabağepe’ kocevoç̌adat. Oşǩendas baba keǯevumxanat, otfa oǩaçu şeni. Hus do mele aşǩva maǩasepe kocevosvarat. Merteği kocevoç̌adat çeremit̆a şeni. Hikele xolo koceft̆at tude. Covdeşi piʒarepe dopşǩorat do kodolovoxunat. Piʒari xižarite pşǩorumt, himus-ti ust̆aluği diç̌is. Doğramape msǩva ižiras ya do hikele hakele komevudagat. Oşǩendani ǩuşaği-ti kocevoç̌adat şuǩale eǩna-ti kocevobat. Meteyizişi araluğepe-ti kodolovoxunit-i serende diçodu. Ha, msǩala mo gomoç̌ondran. Muyate ext̆anene? Çeremit̆ape komoği, keyevutvat. Lazut̆i moxt̆as aşǩva cevobğatere.

Serende nenate a xovi kodobdgit? Ya ese kort̆uǩo...
A serende ar-jur tutas iǯopxen. Oxmarare malzeme do are dulyas ʒadums. En oği oxori sahibis nayonare do goǯirasere onaşe ç̌ubri ncalepe ǩvatare. Serende şeni na-oxmarare ncalepe ǩoşǩuyonare. Ana direğepe şeni jurneçidovit, artepe şeni eçi ǯaneri ç̌ubri nca diç̌is. Ǩat̆a nca va iyen. Serendeşi perçepe –
gamulur do gulur ya- opşa sağlam ot̆asere. Hele ǩariǩape... Covde himuk oǩaçams.

Morderi do ǯulu serende ar va iyen xoşi...
Aa. Serende boy boy iyen. A morderi, ar-ti ǯulu serende iyen. Bazi serendepes mbağu ayen, a t̆arafis dolapi st̆eri eludginaman. Çimi-ti meteyizli... Morderi serendepe jur ǩati iyen. Jini ǩat̆is eyilven do goylven. Cedgare sva (let̆a) morderi on-na serende-ti morderi iyen. Oxinapamsis nca fazla uğun do morderi serende gorams na-ti hişo. Çimi svas naǩişli –medageri- serendepe-ti mixinapun. Argunite mevudagamt̆it, mo oǩomant̆alan ma do mevuğaramt̆it.

Serende şeni temeli va eşǩiğamt̆ito do nak eyodgamt̆it? Muç̌e dogutinamt̆it?
Enimt̆i serendeşi sva gamapkosamt̆it do otxo tane kva kodobdumt̆it, terazite. Nca eyodvaloni diyuǩosis nca eyobdumt̆it. Vana xolo kva meşǩevudumt̆it. Sade serende var, divi st̆eri oxorepe-ti hişo dobdgamt̆it. Ee Oxori do serende havada iyen. İxi moxt̆uǩos, ya-ti opşa mtuǩos elininktuǩo elininkten. Him enimt̆işe xesapare da. Heşeni ǩat̆a koçi dulya var on. Ust̆amu vorsi kot̆uyi muti va ağoden. A serendes va comç̌imas do ǯari va eç̌opas-na oşi (100), oşi do jurneçi do vit (150) ǯana nuxondun. Ç̌ubris muti va ağoden, va kʒun. Elat̆roxasere çeremit̆ape gonkturare ǩat̆a ǯanas. ʒadare da.

Evelis ǩat̆a oxoris serende eluǯopxamt̆es-i?
Megza na-uğunis ho. Serende oxorişe mendra va iyen. Ot̆uǩo ot̆uǩo 5-6 met̆ro. Serende oxorişi gamaxmaran. Evelis opşa lazut̆i iyet̆u. İri him vimxot̆it. Hist̆eri serendepe ot̆u-çi lazut̆i doloxe nçxvarumt̆es. Lazut̆i xvala-ti var. Demiri oşǩuri, mç̌ipe xurma, mʒxuli, topri, peǩmezi... Mtucik ǩibri na-cedgams iri tevuli hik şinaxumt̆es. Serendeşi ǩat̆a ǩale araluǩli piʒari gotveri iyen. İxi amulun. Daha evelden mşǩerite ceşumt̆es. Çelti uǯomeran. Lazut̆i vorsi xomas ya do. Him hist̆eri hast̆eri ust̆aşi dulya va on. Esasli ust̆a diç̌is.

Muyape oxmaramt̆it?
Enimt̆i daha arguni. Uǩaye sǩepali, ǯulu xižari, bişǩi, rende. Çenarepe medagu şeni ǯulu-morderi aşmape. Rende st̆eri. Nca oyazu şeni cenişi pici-te sǩepalepe iyet̆u; berci st̆eri. Hini voxmaramt̆it. Piʒari şeni na-diç̌iren iri tevuli da. 

Ǩafri... Ǩafri dixo iyen-i?
Evelis ǩafri dixo ikumt̆es. Art̆iǩat̆is doloxunamt̆es. Ǩafri-ti piʒarişet̆u. A mʒiǩa payi mevut̆omalamt̆it, xomas ya do. Ma hiçi ǩafri dixo va mixinapun-na-ti ǩoǩomixvapun. Çamlihemşinişi çoyi Maǩrevisis. Min evelçinuri oxori ǩoǩopxvit, daha morderi-muşi pit. Haşo ç̌ubri mt̆eʒişi oǩonǩorerepe gamalu. Oşi ǯanaşe esǩi ot̆u ama hiçi muti va ağodudot̆u. Otva-muşi-ti mturik mo cet̆axas ya do diki doyes do jindo mdiǩa msvalepe kocorçes dot̆u. Çeremit̆a bile va eyutut̆u. Zat̆i Xemşinişi (Msumexi) oxorepe iri Lazepes uxinapuran. Hini jur ǩat̆i, morderi oxorepes (ǩonaği) xet̆es.

Ndari, let̆a çeremit̆ape uǩaye gamaxt̆u hindos...
Helbet̆e. Çeremit̆ape haminepes ipt̆is Paniç̌işe moğamt̆es. Uǩaye uǩaye Samsoni do Toǩat̆i Erbaaşe moğmalu coç̌es. Evelis ǩuyipe ot̆u, çeremit̆a do tuğula ç̌umt̆es. Şǩuni çoyis Şukri dayik (Eşu) ç̌umt̆u, çerani livadis. Ç̌alimri let̆a diç̌is himu şeni. Him ǩeç̌opamt̆u. Ǩalopepe uğut̆u, hinis kocedumt̆u. Toyç̌ite doşǩoramt̆u. Ğvari xepe a keyusumt̆u. Diyet̆u çeremit̆a.

Piʒari oxorepe muç̌e ikumt̆it?
Oxori-ti serende st̆eri iyen da. Oxori şeni evela let̆a gamiğam. Serendeşe daha morderi sva diç̌is. Let̆a dozona şuǩale otxo tane ç̌ubri nca kododum. Mjora nakele na-nodums doxesapi-i odape doteksimam. Ham doxunu, ham docinu şeni ya do. Oxori sahibik-ti muç̌e na-gorums giǯomes. Evelis çenefi gale iyet̆u.
Oxori doloxe va vikumt̆it. Uǩaye uǩaye evala kva, himu şuǩale-ti tuğula oxorepe komoşǩiğes. Puci na-noǩoraman tudeni ǩat̆i ǩarat̆aşişe, jin-muşi tuğula svarumt̆es. Eni jin-ti onʒxeni, puci oşǩomale molabğalu, nçala oxominu şeni.

Piʒari oxoris-ti ç̌ubri nca oxmaramt̆it-i?
Moro. İri ç̌ubri var. Bazi svalepes ʒipri ixmaren ama en opşa ç̌ubri nuxondun. Him do made mç̌oni do neži-ti ixmaren. Hini-ti nuxondun. Oxori, serendeşe ayiri on. Oxoris iri tevuli iyen, konamsǩvanen. Daşǩuri oǩogzalu şeni ocakluği (nç̌era). Himu ǩapulas ot̆rebi, dişǩa cosvaramt̆es do oxominamt̆es. Bazi-ti ǩat̆upe golicinet̆es. Niçxunamt̆es, guri nantxet̆es. Cari cexvalu şeni cest̆a, daşǩuri jindo ǩlemuri, ǯulu ǩuǩma, ya-ti ç̌uǩani celabaman do oşǩomelepe cibaman. Hindos pilit̆ape var on. Daşǩuri oği doxeda do ninçxunare.

A oxorişi mut-on dulya ayni ust̆apek ikumt̆es-i?
Ho. Jur ust̆a iyet̆es. Him juri-ti oǩiyanet̆es do oxori domponamt̆es. Bazi jur cuma iyet̆es. Ramet̆li Xelili do Must̆afa dayi, Baynazi Nuri do Şukri dayipe hişo ot̆es. Ma ǩarat̆aşişe oxorepe-ti pidon. Tuğula baği uǯomeran himus. Tuğula na-şumt̆u ayiri iyet̆u. Şǩu dolodganene svalepe devuxažiramt̆it do hinik
dolodgamt̆es aşǩva. Ma hepeyi ǯana ramet̆li İbrahimiǯa-şǩala (Yaşar) miçalişapun. Bandurmaşe beri.

A oxorişi ust̆aluği naǩus gamulut̆u?
Ust̆apek ekseri yovmiye usuli içalişamt̆es. Şǩimi vaǩit̆is yovmiye 2,5 –ʒ Lira ot̆u. Cari-ti hinik kçaman. Nca malzeme xomas ya do bazi viyondramt̆it. Hindos hişo daha içalimet̆u. Ust̆a naǩu ndğa idu moxt̆u doxesapumt̆i. Oxori na-oxinapaserek-ti ya oǩiğamt̆u, ya-ti iʒxamt̆u. Va eyanç̌eǩes vaǩit̆is bazi şǩu  mevut̆omalamt̆it sum-otxo ndğa, ya-ti hinik hiǩu haǩus va ʒadumt̆es. Him artuk koǩovixalalamt̆it.

Ust̆aşi a ndğa naǩu sahat on?
Husoneri st̆eri ovro sahati va on. Mjora ext̆aşe cext̆aşa da. Mjora pi ext̆ayşa moǯuǩapare do cari melidvare, mjora ntoli delipşasis naşǩvare. Ust̆aşi a ndğa him on. Yevana hiǩu dulya mik moysvarasere?

Karmat̆e ya t̆ǩvi. Karmat̆epe muç̌e ikumt̆it?
Karmat̆e ceʒulva na ono şeni ordo içodet̆u. Himus-ti otxo nca dobdgamt̆it do jimu evulut̆it. Muyançi? A ǯulu ǩut̆ina şuǩu. Jindo otva komovutumt̆it. Ar-ti omçvere devuyamt̆it. Kva keyobdgamt̆it. Evelis kva va ot̆uşa- ǯari na golulun oluğe-ti ncaşe ikumt̆es. Morderi txombu nca eǩvatumt̆es. Xižarite ǩoǩoşǩoramt̆es, tudendo jişa. Uǩaye guri kogamuğamt̆es. ǯari na doloxt̆asere t̆arafi daha fazla, tude mç̌ipe naşǩumt̆es. 20x20 ya ti ʒ0xʒ0 santimi. Hini teçari koǩodgamt̆es. Diyet̆u oluğe.

Karmat̆e kva nakele moğamt̆es? Mik yazumt̆u?
Kva na-yazums ayiri ot̆u. Kvaşi oluğe-ti hinik ikumt̆es. Karmat̆e kva Murğulişe mulut̆u. Him kva haminepes va iyet̆u. Himinepes t̆axumt̆es do gamiğamt̆es. Cedumt̆es ǩayiğepes, xope zderi noğaşa komoğamt̆es. Teçari hak mpirumt̆es do keyodumt̆es. Nçaxi devuyamt̆it. Him artepek-ti moconi, ǩariǩa, omçvere duyamt̆es.

Ar-ti ǩayiğepe ot̆es xolo ncaşe...
Ǩayiğepe-ti ç̌ubrişe ikumt̆es. Feluǩa uǯomet̆es. Jur parça oǩodgamt̆es do ikumt̆es. Mbuli do ʒipri ncaşe tudeni t̆abanepe-muşi doyeǩes şuǩale eçi santimluği ǩarbuğape cusvaramt̆es. Mendriǩeri ncalepe ǩoşǩuğamt̆es. Mşǩerişe ǩafri gamiyonamt̆es. Mşǩeri ǯulu iyen, nca st̆eri va imorden.

Piʒari oxorepe mo naşǩves piya?
Piʒari oxori mo naşǩves, ç̌ubri nca moyǩvatu. Serende mo naşǩves, lazut̆i moyǩvatu. Serende muya şeni diç̌is en opşa? Lazut̆i şeni. Lazut̆i va ot̆as serende muya are? Ar-ti oç̌u on. Piʒari oxoris a sotxaşe daşǩuri konağaluyi oçuletinu var on aşǩva. Eee evelis daşǩuri, oxori oşǩendas vogzamt̆it. Onʒxeni, xomula
nçala do çayirite pşeri. Ceʒxondurerişe a paluri kamuǩapuǩos diyu da... Esǩi piʒari oxorepes mtuci izuvalet̆u. Heşeni ǩat̆u ʒadumt̆es.

Lazepes, ǩat̆u teveçeli opşa alimberan. Ham a mʒiǩati mtuci şeni on mecere...
Moro. Ǩat̆u muya şeni ʒadare? A mʒiǩa-ti mtuci şeni. Ǩat̆u na-on oxoris mtuci hiǩu amvalen da. Serendepe muya şeni parpapes cedgun? Mtucişi var eyolva şeni. Heşeni tudendo direği meçaman. Mtucis parpa va moyanǩapinen. Hindos jin va eyalen. Varna muti naşǩumt̆u-i? A seris koceşǩomaset̆u.

Serende oxinapu mundey naşǩves Lazepek? Soni serendepe do soni ust̆ape tǩva oret beçi da...
Serende oxinapu na-naşǩves jurneçidovit ǯana kot̆asere. Ust̆a iǩitxa na-haminepes var on. Civarepeşi vami aşǩva. Serende mendra dodvi, a mbelis sapi na-modvasere ust̆a va žirem. Hus iri tevuli fabriǩas gamazot̆aman. Ma maxenenşi ǩomşipes mevaǩatur, moxt̆asere ceri va govoktam.

Cemil dayi, si piʒari oxori hem gixinapun hem-ti degigutinapun. Esǩi oxorepe do ağanepe a oǩobzumiǩot...
Piʒari oxori do kvaşi oxori ar iyen-i? Himus dicinasiy ç̌umanişe parpali st̆eri moyseler. Ne ǯuna ot̆u evelis ne-ti muti. Esǩi dida do badepe pirpila st̆eri iktet̆es. Opşa nuxondut̆es. Piǯarik rutubet̆i moyzdams. ǯari gobiǩo oşums. Kva hişon-i? Ticeri komeçams. Haminepes boyine opşa mç̌imt̆u ama miti romatizma va iyet̆u. Ağani oxorepe gamaxt̆u şuǩale ellibin xast̆aluği cinžiru, milet̆i kocibğu.

Cemil dayi, idi svalepey Lazi na-ore apxasinet̆es-i?
Aa. İris alimbet̆es. Ma mitis guri va vut̆axamt̆i, hiçi miti-ti ceri va govoktamt̆i. İrişi dulya vuyamt̆i. Migoranenet̆u mepçamt̆i. Lazepe kuşǩut̆es zat̆i. 9ʒ xarbi muhacirepe ot̆es himinepes. Lazepe na-var on sva on-i? Bandurmas viçalişamt̆itşa oǩovint̆alit a fori. Ǩoçi epç̌opumt̆işa dulyaso... Şǩu ǩoçi emaç̌opet̆es him zamanis. Lazuri a keǩixaparu ar tanek. Kodomaguru do hiçi orali va viyi. Hemeno haşo “xepe ǩelemite goyğari” ma vuʒvi do eç̌opaset̆u ǩoçis toli cevuçi, “xe goğareri na-onus muti mo uǩitxam, ma imtihani dopi” ma do. Daha goǯopes emeǩli iyu, telefoni miyams boyine.

Cemil dayi, Xemşilipeşi ǩonağepe-ti iri Lazepes uxinapuran. Lazepe diriney ndğaşe ust̆aran-i muyaran?
Ho ho, iri hakele ulut̆es. Msumexepe çoği furunci do past̆aci oran. Ust̆ape, it̆ur st̆eri iri Laz oran. Lazepe min evelden ust̆a oran. Evelis ndağepes nca opşut̆u. Kva va ot̆u daha. Muya an? Nca oxmares da. Ǩat̆a oxoris a mutxape na-axenet̆u ǩoçi iyet̆u. Berepek-ti hinis noǯet̆es do kodiguramt̆es. Uǩaye uǩaye-ti a ust̆as kelvaǩatet̆es do a ǯana kogoxt̆eǩes kodiguramt̆es. A oxori douyi diyu da. Ust̆aluği iri xesapi dulya’n. Mesela eǩnaşi cenişluği naǩu naşǩvare, yukseǩluği naǩu... Hani iri xesapara. Ǩat̆a ust̆a-ti ar va iyen. Esǩi ust̆ape hem mimar ot̆es, hem muhendisi.

Ma muhendisepe-şǩala viçalişamt̆i. Muya miǯomet̆es gişǩun-i? “T̆ǩva şǩuninde vorsi gişǩuran, muyaşeni-çi ǯuluşe dogureri oret” Huso ma atalya şefi vot̆i. Şǩimi dulya zor’ot̆u. İri tevuli ma goyomžut̆u. Jureneçi tane ust̆a miyonut̆u. Ma malzeme eç̌opinuşe vulut̆i. Ham dulya ham zamanis, ham dulya ham zamanis atere ya do devuteksimamt̆i. Vana kodoxedut̆es. Dulya zamani-muşis are.

Filiz Hocaoğlu

Son Güncelleme: Perşembe, 12 Nisan 2012 11:04

Helimişi XASANİ

Helimisi
Lazcanın Evrensel Şairi

Coxope

Coxope
Çocuklara Lazca İsim

93 Harbi

93 Harbi
Muhacir Lazlar

Arkeopolis

Arkeopolis
Lazika'nın Başşehri

Lazca Açıköğretim

Lazca Açıköğretim
Açıköğretim Başlıyor