Tue01162018

Last update06:26:30 PM GMT

Font Size

Profile

Menu Style

Cpanel

Lazonas skidala

  • PDF

Gaceran, hemorapeşi ǩoçepeşi goşortas na-ren megabroba, t̆uʒanoba, meşvelapa mu p̌at̆iki hamorapes çkar va ren. Mteli hamtepe hem oras irik skidala şeni doğaşe ǩele dido dža moşkva na-içalişinen ar ortamişen mulun.Beroba çkimişi Arkabi gomaşinen. Beroba çkimişi oraşen handğaneri oraşe Lazonas, Turkiyes do Svamogvales dido muntxanepe ikturu. Hem oras na-vart̆u do haǯi na-ren dido çkva muntxanepeti ren. Hemoras na-vart̆u coxo muşiti na-var işinen do haǯi na-ren dido çkva muntxanepeti ren, haǯi na-ren dido muntxanepeti hem oras vart̆u.

Lazonaşi skidala ǯoxlenoraşen ham oraşakis dido ikturu. Haya oşiǯanak na-moiğu kturapape ağanobapeşi meonas, hamtepeşi didope skidalas perpupa na-meçams şeni ukorstuti.
Ham kturapeşi didope ağanmordalepes var uçkinan. Na-var uçkinanşi muşeni hem orapes na-var skides şeni ren. Lazepek ǯoxle muç̌o skidut̆es ma oxogoǯonapaten. Na-ikturupe na-iskedinen ham dğalepe oǩozumanşi hemtepekti oxoǯonanoren. İsati Ham na-oxogoǯonapamtpe jurneçidovit ǯana oğuneşen ivasen.

Gaceran, hemorapeşi ǩoçepeşi goşortas na-ren megabroba, t̆uʒanoba, meşvelapa mu p̌at̆iki hamorapes çkar va ren. Mteli hamtepe hem oras irik skidala şeni doğaşe ǩele dido dža moşkva na-içalişinen ar ortamişen mulun.Beroba çkimişi Arkabi gomaşinen. Beroba çkimişi oraşen handğaneri oraşe Lazonas, Turkiyes do Svamogvales dido muntxanepe ikturu. Hem oras na-vart̆u do haǯi na-ren dido çkva muntxanepeti ren. Hemoras na-vart̆u coxo muşiti na-var işinen do haǯi na-ren dido çkva muntxanepeti ren, haǯi na-ren dido muntxanepeti hem oras vart̆u.

Arkabişi noğas jur ǩele, xvala piʒarişi xeneri dukkanepe rt̆u do enni dido jurǩat̆oni kvaşi do piʒarişi xeneri oxorepe rt̆u. Oxorepeti oǩobğeri vardo goşabğeri irixolos muşi let̆apeşi ar ǩelas ǩoderi rt̆u.
Elektriği na-vart̆u şeni Elektriğite dulya na-ikoms çkar mutu telefoni, televizyoni, xoloti elektriğite na-içalişams makinapeti vart̆u. Hemoras ağani na-gamaxtudor’tun ar radiope kort̆u do p̌ap̌uli-çkimik heya didi bataryate oçalişapamt̆u, xvala acansis uucamut̆u batarya diçodasen yado, çkunti xe var memontxapamt̆es. Heti iri oxoris var uğut̆u. Ar ndğas umçanepek na-moxtasen orapes radios op̌aramitu na-ikoms ǩoçiti na-ižirasen ar radio na-ixenasen tkvesşi na-bogni goşaşu handğati gomaşinen. Edo hem oras na-itkvet̆u ǩoçi na-ižiren radio haǯi iri oxoris enni mʒika arteği koren.

Oxorepes lukunaşi xeneri metanonepe, ǯvint̆i, amaǩideri lambape ixmarinet̆u, hemtepeşi tete içalişinet̆u, gyari iç̌ǩominet̆u. oǩaçxeti luksi na-itkvinen mtiniti luksi na-ren iris na-var avet̆u metanoni bixmarit, bitanit. Serepes oxorepes çkva oxenoni duyla var ivaşi, lumcişi gyariş şkule dido var dixunet̆u. İrik ç̌umanişeneri duylapeşe tanoras na-eiselams şeni ordoşen dincirt̆u. Seri, gale soti oxtimu şeni xeşi xeneri demoǩrat̆epe metanu şeni bixmart̆it. Xvala mecepeşi do ç̌andapeşi oras yano orape şakis, dio prapesti tanuşakis dixunet̆u. Oxorepes gyarepe do-angepe xaropes, oç̌ǩomale şeni na-minonan mkveri, yaği steri muntxanepe ntaropes işinaxet̆u. T̆uʒas ordo na-oǩixven yaği, ç̌arxala, xorʒepe ǩai dincumoraşkule let̆aşi xeneri kyupepes oxorepeşi tudele ǩele kvaşi ǩidapeşi tude mjoraşi te na-var žiroms ini sotipes işinaxet̆u. İnoras na-iç̌ǩomasen oç̌ǩomalepeti lazut̆i, ntxiri, ǩap̌et̆işi uşkuri, kyumepe steri muntxanepeti naylapes pşinaxumt̆it do ora muşi moxtaşi hekşen gebimert̆it do bipxort̆it.

Haǯineri gzape vart̆u. Urusepeşi xeneri gzape rt̆u, iri germapeşen rubapeşe ǩirǩoleri, gonǩideri ulurt̆u. Noğaşen ç̌armatişe oput̆eşe, ǩavağişe, hekşen armonişe hekşenti Gverdi ndğaşa viǯeşi noğaşe ilinet̆u. Arkabis Gexunoni arabape jur, sum ǩonari r’tu do soti oxtimu şeni hemtepes jin gyebibğet̆it.Arabaşi gza na-golulut̆u şeni yaǩovitis (Ǩavağis) noğa gyeidget̆u do ar dido muntxanepe gamiçinet̆u. Jin oput̆epeşen na-moxtespek hek oxori mutepeşis na-skidurnanenpes şeni na-uǩors muntxanepe eç̌opumt̆es. Hek na-ren furunepes diǩaşi kovali do ǩerǩeliti ixenet̆u do gamiçinet̆u. Nanaşǩele Gidrevari mota na-bore şeni beroba çkimis hek dido bulurt̆i. Skidala çkimişi iptineri ǩerǩeliti hek pç̌ǩomidort̆un.

Çkun oxori p̌ap̌ul-çkimişi let̆a naren borğola oput̆es miğut̆es. Oxori çkuniti mteli Lazonaşi oxorepe steri kva dp piʒarişi xeneri rt̆u, hek bisteri, hek birdi. Oxori-çkunişe xolos na-ren ǩazonlişe oxtimu şeni didilepes var boçkinapamt̆it do bimt̆et̆it. Hek ndğas jur-sum araba tamo tamo urusepeşi xeneri jin gzaşen xopaşe ulurt̆u do hemtepes boǯǩert̆it do hemtepe bžirat̆it şeni bixelet̆it. Oxorişe moptat̆itşi oxorişen na-mebixiramt̆it xerxi, ǩarfi do languşite piʒarişi araba p̌ç̌ǩadumt̆it oǩaçxe okti sontxanepeşen gamabisurinamt̆it. Dio oraz meblamt̆it do mteli gobincaxet̆it, let̆aten bişlop̌et̆it.

Ǩat̆a oxoris kotume oşinaxu şeni okotumale, pucepe şeni bagenepe ixenet̆u.Oxorepes, ǩeremulis na-gyeǯobun ǯuǩalepes na-iguben gyarepe, luncaxeri, xaci, ǩvali get̆ağaneri, makvali t̆ağaneri do mçxomi t̆ağaneris şuǩa elebopxort̆it. Pucişi mjaşen na-ixenen loʒa do mǯutxe gyarepeti hemtepes ebopxort̆it. Hemtepeşi jinti oramutepeşis na-iven urženi, luği, mʒxuli, mjoli ebopxort̆it. Urženişi ǯǩarişen mcumori do kyume bikomt̆it. Oxorepes msici do ntxirişi ncaşi xeneri oržopeten sarğas gobasvaret̆it dişkaşi ǩuziten ǯuǩalepes na-iguben gyarepe bibxort̆it.

Kapçon-mçǩudi iri oras na-içǩomen gyari rt̆u. Kvaş-grestas xeneri kapça geç̌veris mcumori eberi xeten ar ǩai bipxort̆it. İnoras na-bipxort̆it kyume do ntxiri, xomineri urženi, ǩap̌et̆işi uşkurişi nostoni çkar var gomoç̌ǩondu.Domǯǩupat̆uşi ordoşen oncires meşebilamt̆it, nandidepek meselepe miǯumert̆es do domanciret̆es. Ç̌umanişe mamulik diǩiromt̆aşakis bincirt̆it. T̆aronimuşis ndğaleri ontulepes noderepe ixenet̆u, irik artikatis nuşvelt̆u, çkun berepek noderepeşi oraz lazut̆’işi ğerepeten osteronepe bikomt̆it. Ont̆ulepes didi pagarapes mebunǯamt̆it, hemtepeşi palurepes mobuǩap̌um’tit, ark’eleti parpalepes p̌çişut̆it.

Seriti ntxirişi do lazt̆işi oʒxunuş mecepe ixenet̆u. Arǩele ibiret̆u ar ǩele artikatişe tkvalapeşi ç̌işina itkvinet̆u. Oçiloni biç̌epek do gamatxoni bozopek artikati hek žiromt̆es do artikati ipti hek moǯondut̆es. Ǩai kemençe do guda na aç̌andinanenpek oçandinomt̆u, biçepekti Lazepeşi ožanžalu istert̆es.Ǯpxlenoras orape haşo golilapinet̆u.Na-oxogoǯonapit Lazepeşi ǯoxleneri skidala haşo armʒika muntxanepeten var içoden, ma na-var oxogoǯonapitpe umçanepe tkvanis ǩitxit do kultura-çkunişi majura dagepeti tkvan giǯvanoren..

“ǯoxlenora muşi na var uçkins, na-moxtasen oramuşi var ažiren.”

Ǩai ndğalepes ǩaiten pskidat


Osman Şafak Buyuǩlişi

Helimişi XASANİ

Helimisi
Lazcanın Evrensel Şairi

Coxope

Coxope
Çocuklara Lazca İsim

93 Harbi

93 Harbi
Muhacir Lazlar

Arkeopolis

Arkeopolis
Lazika'nın Başşehri

Lazca Açıköğretim

Lazca Açıköğretim
Açıköğretim Başlıyor