Tue01162018

Last update06:26:30 PM GMT

Font Size

Profile

Menu Style

Cpanel

Ç̌e… Naǩo Mskva Turkuli Ospirapams!

  • PDF

Dido ǩai mşuns, berobaşi ǯanapet̆u. ǯopxulape geinǩolaşi Lazonas berona-çkunişi osteruşi ora-ti komulut̆u. Ham osterupe; ont̆ulepes parpalepe oç̌işinute gyoç̌ǩams, piʒarişen na-p̌ç̌ǩadit arabapete oktişen ǯalendo gelasurinu steri ar dido osterupete mebuonamt̆it. Didote gomteşi berepe ǩala arte bivet̆it do lumci mǯǩupi ivet̆aşa oxorepeşe var bulurt̆it.

Haǯi, irixolos enni dido na-minonan ondi; Berepe-çkunepe şeni “ Ç̌e… naǩo mskva Lazuri ospirapams! ” otkvu ren. Heşo va ren-i…?

Dido ǩai mşuns, berobaşi ǯanapet̆u. ǯopxulape geinǩolaşi Lazonas berona-çkunişi osteruşi ora-ti komulut̆u. Ham osterupe; ont̆ulepes parpalepe oç̌işinute gyoç̌ǩams, piʒarişen na-p̌ç̌ǩadit arabapete oktişen ǯalendo gelasurinu steri ar dido osterupete mebuonamt̆it. Didote gomteşi berepe ǩala arte bivet̆it do lumci mǯǩupi ivet̆aşa oxorepeşe var bulurt̆it.
Hem orapes iptineri ǯopxulas bort̆i, Lazonaşen çkar na-var gamamixtiminut̆uşi ar oras Mp̌olis na-skidun malte-çkuni dobadonaşe moxtu dort̆un. Malte-çkunis, çkuni ǯaneri ar bere-ti uyonut̆u. Beres Lazuri ǩai na-var uçkit̆u şeni Turkuli bip̌aramitamt̆it. Ç̌ut̆a oraşi doloxe hemu ǩala menabre dobivit. Didi moşvacinaşi mteli oras ndğaleri osteru şeni çkuni ǩala he-hi ivet̆u.
Bere ǩala arte bort̆itşi, hemuşi Lazuri op̌aramitus dido mažiʒinet̆es. Hemuşi Turkuli op̌aramitu-ti, hemora şakis Lazonaşen çkar gale na-var gamuxtimun çku dido ktureri momixtamt̆es. Berek çkunden elemaǯǩanşi irik “Ç̌e… naǩo mskva Turkuli ospirampams” ya do oǩobitkvamt̆it. Hemuşi op̌aramitupe t̆amaxeri do toli gonǯǩeri buucamt̆it. Heya igzalat̆uşi, mik daha mskva Turkuli ip̌aramitasenşi oçalişu bikomt̆it, e do xolo-ti var maxenet̆es do ožiʒinoni xalis dopskidut̆it.
Haşo dido ǯanapes naonu oǩoxveri do elakteri Turkuli op̌aramitu-çkuni. Orta do Lise ǯopxulaşi skidalas-ti dido p̌ǯorit mskva Turkuli na-var map̌aramitet̆es şeni. Maguralobaşi skidalas bazi kelimepe ktureri koxiǯonasen ya do hem kelime otkvuşen oncğore mavet̆ez. Sinifepes dersepeşi oǩitxu do nenoni imtixani ivat̆uşi, çkuni şeni enni mǩiteri ora ivet̆u. Magurapalepek çku uça-piʒarişi oğune emoselat̆eşi ktureri na-oxiǯonasen kelimepete cumle gedguşi zoriz kodopskidaten ya do maşkurinet̆es. Berepek çku eizi na-emzdanoren, ar xaliz kodopskidaten ya do şkurinaten na-miçkinanpe-ti gomoç̌ǩondut̆ez.
ǯanape golaxtu do Lise boçodinitşi iptineri fara Lazonaşen gamapti do Universiteşi imtixani şeni Mp̌olişe bidi dort̆un. Hek-ti ham xali ǩala okobagi dort̆un. Didote ar ortamis mutu var mǩitxanşa op̌aramitupes var baǩatet̆i. Dobadona-çkimişi ǩoçepe bžirat̆işi do hemtepe ǩala arte bivaşi biraxat̆et̆i do hem oras na-minon steri op̌aramitus geboç̌ǩamt̆i.
Hemu şkule mağala ǯopxulas oǩitxu do oçalişu şeni Ankaraşe bidi. Hek-ti konaonu ham xali. Ar ortamis “sonuri re?” ya do mǩitxanşi, “Lazonaşen ar Lazi” na-bore buǯumert̆i. Ǩoçepeşi oxoǯona didoten artikatis megnapineri ivet̆u. Zuğa-uçori p̌aramitute “Uy.. Laz misun? Laz hamsi celdun mi? Nasisun… Lazlarin kafasi onikiden sora çalişayimi…! “ steri muntxanepe žop̌ont̆es. İpti dido mutu var oxomaǯonet̆u, nosik-ti var emizdamt̆u. Hamtepek ma, hem “Lazi” miǯumert̆es hem-ti Zuğa-uçori p̌aramitite memoçkint̆es.
Hamtepes “Lazepe mipe renan” muç̌o var uçkit̆es! Lazuri na-var uçkin Zuğa-uçori ǩoçepes muşeni “Lazi” uǯumernan ya do meraği bikomt̆i. Haşo orapes ǩat̆a fara Lazepe do Lazurişi oguru bikomt̆i do; “ Ma Lazi bore.. Çkva, ar nena do kultura miğun. Tkva Lazepe do Zuğa-uçori ǩoçepe ogantalenan” ma do oxoboǯonapamt̆i. Hem orapes ar dido menabre-çkimik “Lazepe mipe renan” çkimden diguru dort̆un.
Ar ora şkule çkva etnuği kimluğoni ǩoçepe ǩala biçinapi. Hemtepeşi Turkuli op̌aramitu çkimişi steri ktureri na’t̆u kobžiri. Ǩibrisuri ar menabre-çkimişi Turkuli op̌aramitu ma, dido ktureri momixtu dort̆un. Hemindo şkule Turkiyeşe galendon moxtimeri, Turkuli ağani na-diguru ǩoçepe ǩala-ti biçinapi. Hemtepek-ti dido elakteri Turkuli na-ip̌aramitamt̆ez bžirişi hemoras ham elakteri p̌aramita muşeni iven koxoboǯoni dort̆un. Jin-muşi dido na-var eidginasen ar xali na t̆u-ti kodobiguri dort̆un. Yani, nana-nena çkva na-uğun ar ǩoçişi majurani ar nena op̌aramituşi omǩitobaşen ivet̆u ham elakteri p̌aramita. Hemoras oxoboǯoni umçanepek “Lazuri mot ip̌aramitamt! Turkuli ip̌aramitamt̆atşi nena ǩai var gaktanoren!” na zop̌ont̆es.
Anadoliaşi ǩat̆a ǩele; Zuğa-uças, Gyulvas, Yulvas, Olandre-yulvas do Trakias haǩo elakteri Turkuli p̌aramituşi ç̌eşidi muşeni na ren, haǯi daha ǩai oxoboǯonam!
Mexola orapes dobigurit, haǯi-ti na-naonen, dido oraşen doni na-mulun “nena-elagaktanoren” ebazgaşi tude na ren mtinepe. Turkuli op̌aramitu-çkuni oisanu şeni biçalişatna, nana nena-çkuni na-oǩomaxvanoren-ti…!
Muç̌o ki; Ar İngilizişi, Alamanişi, Frengurişi Turkuli op̌aramitu var moiǯondinen-na, Lazepes-ti Turkuli op̌aramituşi elaktima, çku Lazepe şeni naturali na-ren miçkit̆anoren.
Haǯi, irixolos enni dido na-minonan ondi; Berepe-çkunepe şeni “ Ç̌e… naǩo mskva Lazuri ospirapams! ” otkvu ren. Heşo va ren-i…?


Osman Şafak Buyuǩlişi

Helimişi XASANİ

Helimisi
Lazcanın Evrensel Şairi

Coxope

Coxope
Çocuklara Lazca İsim

93 Harbi

93 Harbi
Muhacir Lazlar

Arkeopolis

Arkeopolis
Lazika'nın Başşehri

Lazca Açıköğretim

Lazca Açıköğretim
Açıköğretim Başlıyor