Tue01162018

Last update06:26:30 PM GMT

Font Size

Profile

Menu Style

Cpanel

Osman Cumadi Şǩala Vip̌aramitit

  • PDF

İptineri, oşkande do lise slop̌ula arkabis biǩitxi. Ankaras oǩitxus na-geboç̌ǩi Mağala ǯopxula gverdis eǩebit̆ǩoçi. 2000 ǯanas SSK-şen emekli bivi. Emeklişi geç̌areri na-var emanç̌en şeni xolo-ti Arkabis emekli na-bivi duylas oçalişus mebuonam. Mexola eçi ǯanaşen doni nena–çkuni oskidinu şeni çkar umeç̌irdinu, udoç̌ǩendinu didi ar oropa do guriten biçalişam.

Osman cumad, ipt̆i si ar ç̌ut̆a dogiçinat. Osman Şafak Buyuklişi mi ren, naǩu ǯaneri ren, so dibadu, so skidun, muç̌o skidun?

Lazi kultura do nenaşi oroperi ar Lazi ren. Xvala Lazi kultura do nenaşi oroperi var do mteli ǩoçinoba do gomte-oroperi ar ǩoçi ren ptkvat-na daha mtini diven.

ǯana 1955-şiz Lazi nana do babaşen Arkabis toli gomǯǩi skidalaşe. Skidala-çkimişi xvala 1975-1986 ǯanapes Lazonaşen gale pskidi. 1986-şen doni Arkabis pskidur.
İptineri, oşkande do lise slop̌ula arkabis biǩitxi. Ankaras oǩitxus na-geboç̌ǩi Mağala ǯopxula gverdis eǩebit̆ǩoçi. 2000 ǯanas SSK-şen emekli bivi. Emeklişi geç̌areri na-var emanç̌en şeni xolo-ti Arkabis emekli na-bivi duylas oçalişus mebuonam. Mexola eçi ǯanaşen doni nena–çkuni oskidinu şeni çkar umeç̌irdinu, udoç̌ǩendinu didi ar oropa do guriten biçalişam.

Dido oraşen doni Lazuri maǩalepe ç̌arum. Muşeni Lazuri ç̌arum, Lazuri oç̌arus muşeni gyoç̌ǩi? Solen gogaşinu Lazuri oç̌aru?
Ho, Arhavim.net is na-geboç̌ǩi Lazuri oç̌arus Lazebura.net do Arhavizyon.net sitepes haǯi-ti mebaonam. Ǩitepes menceli mavaşa-ti mebuonare ham dulyas.
Nana nena-çkimi muşeni var-p̌ç̌ara! Berobaşen doni Turkuli do Arabuli, oǩuleti İngiluzuri oǩitxu do oç̌aru şeni memokaçes. Nana nena-çkuni şeni mot ç̌arumt, goiç̌ǩendinit ya do memokaçes dort̆un. Xilli na-va ren haşo ar oxoǯonaşe mele dodgitu şeni p̌ç̌arum.
Ǩoçinobaşi oxoǯonak, ma na-momçu çkinapaten geboç̌ǩi oç̌arus. Ma Lazuri ǩai na-uçkin ǩoçepeşen ari, yani çodina nesilepeşen ari bore. Na-miçkin Lazuri nena haǯineri nesilepes doguru, na-moxtasen nesilepes oǩitxu şeni ç̌areri mutu meşkvimu minon. Ǩoçinobaşi çkinapas ma na-manç̌en, na-miçkinpe iri ǩala ortimoni bore. Ham oxoǯonaten oç̌arus geboç̌ǩi.
Ar dido şurimşinek na-enʒun Lazi Kultura do Lazuri nena yoselu şeni muntxanepe ikomt̆es. Ma-ti ham mecişi doloxe dido Lazuri ç̌ara na var-ixenet̆u şeni, na-maxenasen enni ǩai duyla haya ren ma tkvi.

Lazuri ç̌arumt̆aşa muperi problemepe gaven? Lazuris na va ren kelimepe şeni mu ikum? Ağne kelimepe oǯopxu diç̌iren-i?
Lazuri p̌ç̌arumt̆aşi; na-p̌ç̌arum klavyepes Lazuri boncapeşi bazipe va ren. Kimi oras ar bonca şeni jur tuşi ixmarinen, heşo oç̌aru mʒika perpu var iven. Hamuşen çkva dido problemi var miğun.
Ağani kelimepe omralu do moǯopxuşi duyla; Haya xvala ar ǩoçişi xenapaten var-iven. Ham kelimepe goşiğare, svarare, ham dulya ǩala na-ibodenanpes heşo vana-ti haşo oğune goǯudvare. Hek komoiǯondu-na do cinci Lazurişen moxtimeri uğun-na hemoras oxmaruşe geç̌ǩoni ren ma do biozmonam. İlla, Lazuri tkvala na var-uğun ondepesti “Lazuri tkvala bumralat”şi oxoǯonati isa var-iven. Sva-p̌icis na-ip̌aramitinen ǩata nenas çkva nenape na-unt̆alun iris kuçkin.

Lazuri makale ç̌arumt̆aşa, ǩonu muç̌eşi ǩoşǩuğam?
Lazuri p̌ç̌arumut̆aşi ipti; na-p̌ç̌arum maǩales Kultura–çkunis do Lazonas na ren, na-iven ondepe goşobimer. Bazi orapes-ti ǩoçinoba şeni, bazi-ti ǯoxlenora şeni muntxanepe p̌ç̌arum. Mteli maǩalepes; Lazepek skidalaşe “Ǩoçi” oşinute toli na-gonǯǩes, e do hemtepes ar “Kultura do Nena” na-uğunan oxoǯonapu do goşinuşi tema gepşvi.

Si na giçinems ǩoçepek Lazuri na ç̌arum şeni mutu giǯumeran-i? Mu iduşunaman?
Asimilasyonişi heǩo dudis boret ki, didopek Lazuri muşeni p̌ç̌arum, var-oxoǯonams. Bazipek, “Lazuri muşeni ç̌arum? Mu ivasen, muz ipelasen, skidas mu fayde avasen?” zop̌onan. Hemtepes muşeni na-p̌ç̌arum tito tito oxoboǯonapam.. Bazipes-ti Lazuri ǩai uçkinan-na-ti gegapineri na var renan albonişi kimi boncape žiranşi dido ǩai var aǩitxenan.
Kultura do nana-nenaşe meǩoreri oroperepes dido moǯondunan. Hemtepek na-bikom duyla şeni guri-gomindumernan.

Na ç̌arum maǩalepe mu oxenu ginon? Ar svara (kitabi) oxenu iduşunam-i?
Ho, hakşakis na-p̌ç̌ari makalepeşi mʒikape do hemtepeşen çkva xolo-ti na-p̌ç̌arumpete ar supara (kitabi) oxenu minon. Haya; Nena-çkuni oskidinu şeni ar edebiyati na-uǩors, ham edebiyati şeni dido ç̌arerepe na-uǩors na-içkinen şeni oxenoni ren. Meğira çkimi; na-p̌ç̌arum ham supara na-eçkindasen Lazi edebiatis ar elamʒxvama avas.

Haya-ti eçourişi ǩitxala ren. Lazurişi oskedinu şeni ham ora şakis na ixenupeşen met̆a mupe oxenu diç̌irs?
Hakşakis Lazuri nena oskidinu şeni na-ixenupes, hemtepe na-vespes dido mardi boğodam, nʒaşa extan. Haǯi şkule; hakşa na-ixenunpeşen na-ebzdit tecrubete daha ǩai do moǯopxeri ar gzas na-boret içkinen. Nosiari ar şekilite,” Otkvute var, oçalişute imralinen”şi oxoǯonate oçalişoni e do dido oçalişoni boret.

 

Osman Şafak Buyuǩlişi

Helimişi XASANİ

Helimisi
Lazcanın Evrensel Şairi

Coxope

Coxope
Çocuklara Lazca İsim

93 Harbi

93 Harbi
Muhacir Lazlar

Arkeopolis

Arkeopolis
Lazika'nın Başşehri

Lazca Açıköğretim

Lazca Açıköğretim
Açıköğretim Başlıyor