Tue01162018

Last update06:26:30 PM GMT

Font Size

Profile

Menu Style

Cpanel

ǯǩarişi Meseli

  • PDF

Usulaşi na ulut̆es/ Usulaşi na alet̆es maxutani, maotxani, masumani oxorepeşi oput̆es gonǯǩimeri musluğepeşen, t̆ǩvaʒineri borupeşen fuzuli na diben ǯǩarepe kožires do xolo untxes… Mu şeni-ki ǩoçis ǯǩari, gyaris ǯǩari, çais ǯǩari, ǩat̆us, pucis, şuǩas, mʒxulis… mtellis ǯǩari unt̆u… ǯoxle… Ham berepe bere na t̆u orapes… Aǯi?.. Mutu diktiru-i? Aya ǯǩarişi meseli p̌ot̆e iktirasinon-i?

Ç̌umanişi ordoşen kiselu. Bere bari xolo cant̆u. Ç̌it̆a ǩuçxepe-muşi uça kalamanepes kodolodu do merdivenepeşen ç̌it̆a ixi- steri gextu. Gzas na eladgin musluği gonǯǩu. Musluğik, sifte ar mʒika xri xri ya-do xriyalu, ar jur fara doxvalu do eǩule ǯǩari gextu. Gextu mara lemşi- steri mç̌ipe't̆u. Ǩuǩuma ǯǩarişi tude kododu. “Aya ar saat̆is var yipşen” ya-do nisimadu do oxorişa kişaxtu. İnçxi minçxi ar çençxeli bit̆oni dokaçeri xolo ǯǩarişa gelaxtu. Majurani bit̆oni gverdişa na yipşu ǯǩari kameskiru. Xes xvala ǩukuhma dokaçeri oxorişa igzalu, daçxiris çayniǩi gedgu, masaşi jin gyarepe do şuşepe kododu do xolo gale kagamaxtu. “Mçxopa moxta-şakis oput̆e dopkosa” ya-do okosaleşa mextu. Okosu içodut̆aşa berepe do kimoli-muşi-ti kiseles. Xeleberi, žiʒineri gyari koç̌ǩomesşi kimoli-muşi dulyaşa igzalu. Berepek-ti masa dobarges, tolişi ǩunǯuliten ekole akole iǯǩet̆es, moçodineri bit̆onepe kožires do ǯǩarişa oxtimu na unon koxoǯones. Didi do ç̌it̆a muǩo bit̆oni ren-na mtelli doǩorobes, çai na itiren xeş mankanas ( el arabası) kogedves. Ar mǩule xort̆umi-ti yezdes do mahalleşi doloxe igzales. Xolo ğarğaleri, žiʒineri sum oxori miǩiles do maotxani oxorişi ǯoxle dodgites. “- Sevdiye yenge! ǯǩari gyulun-i?” Sevdiyek; “- Dido Mç̌i-ii-ii-iipe gyulun bere-çkimi. Aǯi kameskirun, beki-tina kameskiru. Ekole idit, ekole!” ya-do berepe mendoçku. Berepek mankanas nuntxes do maxutani oxorişi ǯoxle dodgites. Oput̆eşi p̌ot̆ra gonǯǩes do baǩis na eladgin musluği gonǯǩes; ǯǩari cgiralapt̆u. Manişa xort̆umi kogedves do maartani bit̆oni yopşapt̆esşi ar mogvali oxorcak pencereşen ti gamiğu. Didi tolepe do ar didi çarbi uğut̆u, mara iya çarbişen ar mç̌ipe, mara ǩap̌et̆i xoma gamaxtu; “Berepeeee, angepe pçxip doloxe. Tkvan ek na gonǯǩat ak ǯǩari meskirun, ekole idit, ekole!” Berepek mu qvan, xort̆umi kogeǯǩes, mankanas kogedves do “ekole” igzales. Jur oxori miǩilesi masumanişi ǯoxle kododgites. Ek ǯǩari p̌ot̆e va skirut̆u, miti-ti ǩoçis var atxozet̆u mara oxori-mutepeşen dido mendra't̆u. Usulaşi mtelli bit̆onepe koyopşes. Entepek yopşapt̆esşi na ulun-mulun ǩoçepek xolo; “E berepe, xolo ǯǩari var giğunan-i?” ya-do ǩitxes. “Ho, miğunan, mara çkin sp̌ori iqvas ya-do ptirupt” ya otkumu unt̆es mara xvala “ho” ya tkves do miǩiles. Entepek ar ç̌it̆a yoǩuşi na ren ǩvanç̌aloni gzas ǯǩari yopşa mankanaşi tekerepe iktas- ya-do , mjoraşi tude, ǩap̌et̆i na untxipt̆es mankanas aya oǩitxu muǩo fara xolo ognes do entepes-ti ayni coğap̌i meçes. Usulaşi na ulut̆es/ Usulaşi na alet̆es maxutani, maotxani, masumani oxorepeşi oput̆es gonǯǩimeri musluğepeşen, t̆ǩvaʒineri borupeşen fuzuli na diben ǯǩarepe kožires do xolo untxes… Mu şeni-ki ǩoçis ǯǩari, gyaris ǯǩari, çais ǯǩari, ǩat̆us, pucis, şuǩas, mʒxulis… mtellis ǯǩari unt̆u… ǯoxle… Ham berepe bere na t̆u orapes… Aǯi?.. Mutu diktiru-i? Aya ǯǩarişi meseli p̌ot̆e iktirasinon-i? Vildan MANELİŞİ

Son Güncelleme: Pazar, 08 Nisan 2012 07:11

Helimişi XASANİ

Helimisi
Lazcanın Evrensel Şairi

Coxope

Coxope
Çocuklara Lazca İsim

93 Harbi

93 Harbi
Muhacir Lazlar

Arkeopolis

Arkeopolis
Lazika'nın Başşehri

Lazca Açıköğretim

Lazca Açıköğretim
Açıköğretim Başlıyor