Tue01162018

Last update06:26:30 PM GMT

Font Size

Profile

Menu Style

Cpanel

Monǩa Şuri

  • PDF


Mustafa DelibasMiti muşi cennetis va ren şeni irik ğura çumals. Ğuraşen ǯoxle çkva mitişi cennetis, ğuras uqondeps!..
Noǩa miliyari ǩoçi ren na eǩo miliyari cenneti unon, mitiş cenneti ar va ren şeni .
Xarxi cennetis pskidur iya mevagnişen doni, oras coxo çkimi gomoçǩondun, oras nanaşi. A cennetis qini mjora, ǯǩupi tuta, so re nana?

Komiçkin, mtelis xvala çkini şuri miçkinan do izmocepes xvala çkini izmocepe...

I- Xarxişi canneti 

Miti muşi cennetis va ren şeni irik ğura çumals. Ğuraşen ǯoxle çkva mitişi cennetis, ğuras uqondeps!..
Noǩa miliyari ǩoçi ren na eǩo miliyari cenneti unon, mitiş cenneti ar va ren şeni .
Xarxi cennetis pskidur iya mevagnişen doni, oras coxo çkimi gomoçǩondun, oras nanaşi. A cennetis qini mjora, ǯǩupi tuta, so re nana?
Mḉita ʒa, mḉita zuğa, mutus var nugaps ğuraşen çkva; mpula. Çkim kianas, mpulape ǩvinçepes, çxomepes, pukirepes do ntxozeri tomapeten melaikepes nugapan, akonaşi xvala ğuras, çkva mitişi var çkimi ğuras, do cenneti şeni ar fara ğura unon na ǩoçik mu qvas?

I-I- Onťkobinu
Aǯi, araburi ar birapas komişamťkobi. Akonaşi ma çkva mitis var važirer şeni guri serini miğun. Ar Araburi birapak monťǩobinaps. “A vava inoua” ar vava viqver emuş ǩala. Xeleri mişapxedur do ar birapaşi doloxeşen ṕçarup aǯi.
Gale mtviri mtups, mḉvima mḉups, mu moçelun. Gamaptina mtvirik mgibups, mḉivak mḉups.

I-II- Monǩa şuri
Muǩo-ti ar varťas ti na irişi cenneti. Oxelu şeni ğuras mo vuqondepťat. Artimajuraşi daçxiri mo viqveťat minon. A kianas miti ǩata oras xeleri var iqven nosi var amťaşi. Komiçkin. Mitxa ti ǩata oras bgareli gulun emus ti nosi amťen a ti komiçkin.
Mtelis ar şuri miğuťan tina, çkinden ǯoxle ğureli naǩo koçişi skidala, xela, ǩaoba, mʒudoba, bgara, ğura çkinǩala memiğunan. Çkinden ǯoxlenepek na uqondes do var ažires qoropape, oǩomadupe, cennetepe, skidalaşen-ǩele iri xolo muteşi çkin memiğunan, şuri çkini ǩala.
Do ilavuǩatat şi çkini skidala ti, mu monǩa iqven şuri. Mteli mcveşepe do çkini şuri oǩokateri.
Çkinden ǯoxle mitxa skidu, emuşi izmocepe, oǩomadupe, qoropape iri xolo memiğun çkinǩala. İri xoloşen na iguru ḉvini ti, xeleba ti. Mutxa skidu, žiru, nǯiru entepe do entepes na gyodu coxopeti na memiğunan şeni monǩa miğunan şuri.
Komiçkin, mtelis xvala çkini şuri miçkinan do izmocepes xvala çkini izmocepe...
Cennetis ğuraş ǩule mevelurt var na artimajuraşi cenneti voret iya var bžiropt. Mcveşen mutxa moṕalunan kyari, çkiniş ǩule mutxa domoskidan e ti!..
A skidala xvala çkini var ren, naǩo skidala gemožinan ǩapulas, naǩo oǩomadu...

Sinan Badişi

Çanakkale-20.11.2010

Son Güncelleme: Pazar, 08 Nisan 2012 07:15

Helimişi XASANİ

Helimisi
Lazcanın Evrensel Şairi

Coxope

Coxope
Çocuklara Lazca İsim

93 Harbi

93 Harbi
Muhacir Lazlar

Arkeopolis

Arkeopolis
Lazika'nın Başşehri

Lazca Açıköğretim

Lazca Açıköğretim
Açıköğretim Başlıyor