Wed06282017

Last update06:26:30 PM GMT

Font Size

Profile

Menu Style

Cpanel

Dutxuri ṕaliǩari, Mecit ÇAKIRUSTA

  • PDF

mecitcakirustaNdğalepeşi ndğa, noğaşa cefťare ya do gza kocegutu. Noğaşa xut saeťişi ileťu. Him ḉuma-nişi mʒiǩa leba mvaselu doťu, noğaşa (Atina/ Pazar) cexťaseťu, mutu dvaḉin iyindraseťu do him ndğa oxorişa gigtaseťu.

Noğaşa ǩocexťu. Na iyindru şeyepe ťiǩina kodolokrexu do oxori gza kocegutu doťu. Oxorişa olva leba maasen, seri iyasen, mǯupi maasen ya do xeşineri, ǩaṕineri igzaťu.
Dvanḉinu doťu, yuki-ti monǩa uğuťu, seri dvau doťu, xe svaleri igzaťu, toli var iziťu, tuta-ti var oťu, mtutasťe serepe ondğeri sťeri iyen himora çona va diḉin.
Hişopete gzalineri raǩanişa kexťu, raǩani ǩaṕula a livadi ǩoťu. Livadişi ar ǩalivi koťu. Oxorişa olva şeni dido gza uğuťu, ǩalivişa elafťa do hiko dobotana ya do ǩalivişa kelaxťu. Ǩalivi exťusi, oǯedu tipişi enḉilepe ǩocobğes doťu.
Tipepe elazdu do komeşǩinciru, a tipi enḉili-ti yasťuği dixenu, dido nḉineri oťu do dvanciru, muku ora şǩule osinapape ognu, him nenape ǯulu ǯulu naxoleťu, nenape-nişişa ar biḉi do ar oxorza na-oťu ǩoxvoǯonu, sinaperi sinaperi hini-ti ǩalivi var exťan-i!
Haǯi ma mu ṕare ya do iduşuťu. Ǩalivişa exťes do kodoxedes, žiʒamťes, žiʒineri isinapamťes, na-oxoboǯoni şiǩu hini iyoropeťes, biḉi bozomota uǯuçi, kogşun-i? Şǩu ǯari ṕici biçinitu doťu. Bozomota: himora şǩule coçu oropa-şǩuni ya uǯu. Na ncaťu yerişa tipepe elazdu do ixosyaťu.
Oxorza a boxça, ǩoçi-ti a ǩuǩmina ǯari oǩaçuťu. Kodoxedes do cari oşǩomu kocoḉes, na-golilu ndğalepe isinapamťes, biḉi him ndğalepe gvaşinusi, guri eyaxaşǩalu do xe na-okaḉuťu biga him Dutxuri ti na-cuzuťu yeri cocvaťusi, Dutxuri beťi amğorinu, abejğinu, himdo oxorza do biḉi odi utvaǯes do şǩurineri hikole imťes. Dutxuri-ti amşǩorinu doťu hini na-naşǩves carepete a vrosi korba dizğu do ťiǩina-muşi mibu do Dutxeşa igzalu.

Oǩorobu : Mecit Çakirusta


Ṕaliǩari botişa tişa na-momixtupe
Nana do baba ngola, pucepe çumťes. Ngolaşa na-moxtes şǩala, mçveri do mcumu domaçodes komomincğonan ya do mimçines doťu. Ma-ti, mçveri, mcumu, oşǩomalepeşi mutu maxenu koǩoṕǩrexi do ngolaşa keşǩebiği doťu.
Mancurani ndğa-ti gobigtaťu, xaşǩa ora oťu, dido dulyape miğuťu. Ngolaşa andğeri gza oťu. Andğaşi eşǩilen, andğaşi cileťu. Na gobigtaťu ndğa ḉineri na-boťi şeni leba gobǩuʒxi mobiseli şǩule nana do baba-ti dido gomau doťu, hini-şǩala osinapute caroba domau doťu.
Nana ağani lazuťi cari domixenu do meyaperi koceleminşxu, a vrosi korba dobizği şǩule çoyişi gza kocebguti. Cemolumcasen, leba maasen, mǯupi diya-na muṕare ya do biduşuťi, akale-ti bukaṕamťi. Sum saeťi şiǩule a cezenera yerişa mendemalu do biḉepe ixoroťes, oxorzalepe kodoxedes do seyiri ikumťes, ngola coçi oťu, ngolaşa eşǩiťes, ma-ti bidi xoroni kelebaǩati do bixoronamťi.
Xoroni oǩixu do hini ngola ǩale ma-ti çoy gza kocebguti, dolumcu doťu, mǯupi diyu doťu, ar raǩani efťi do moyobilisi ar daşxuri çona komaziru do oxori na-oťu koxoboǯoni, oxorepeşa mendafťi, na-memagu oxorişi neǩnaşa bidi, amapǯedisi miti miti va maziru, miti var on-i? Ṕťǩvisi miti nena va momçu.
Oxorişa amafťisi osxeneşa eyolva şeni ar msǩala komezuťu, osxeneşa efťi kocepxedi do hiǯikole bixosyaťi.
Mundera şǩule ar oxorza oxorişa kamaxťu do neǩna dungtu. Macida kododgu, gresťa na-cezuťu lazuťi cari macida koceťaxu do ḉuǩalişa ar ciberi korme eşǩiğu do himu-ti macida kocedu.
Muǩu ora şǩule neǩna irau, oxorza neǩna gonǯusi ar ǩoçi oxori kamaxťu, oxorza şǩala ǩarti ǩarti kogvaǩores dincudes. Oxorza; si mendrale mulur, doganḉinu a hako kodoxedi ya do macidaşa iyonu do kodvoxunu, himu-ti gigtu do neǩna cenǩolu.
Ǩoçi macida kodoxedu, oxorza-ti na-cibu doťu korme oşǩenaşa oǩoǩvatu, gverdi macidaşa komoğu do himuşi gverdi-ti ǩoçi sağani kocudu, mancura gvedi-ti sağani-muşi kocidu do oşǩomu kocoḉes, aǩale-ti ğvini (şarap) şumťes, isinapamťes, incudamťes, mtǩt ora şǩule neǩna irau do oxorza ǩeǯukaṕu, huy mu ṕare ya do sevdali-muşi ǩaryolaşi tudele komeşǩvoxunu na-imxoťes sağanepe kezdu do ağani sağanepe, macida kocedgu.
Himora şǩule idu neǩna gonǯu, so ore huşa macida dogixaziri, si mǩḉeşum ya uǯu. Macida kodoxedes do cari şǩomaneťu, mḉera na-celaxeťu ǩaťu macida sağani na-cezuťu korme caǩaṕu do ǩaryolaşi tudele komeşǩaxťu, oxorzaşi badi biga eḉopu do ǩaryolaşi tudele na-meşǩaxťu ǩaťu cebçare ya do ǩaryolaşi tudele eǯucvaťusi oxorzaşi sevdali ti komvaťu do beťi abejğinu do kogamaǩaṕu, ǩaryolaşi tudeleşa do koǩvaḉapxes, ǩarti ǩarti imbareťes, himora ma-ti va maḉibru, osxeneşa kocefťi, oxorzaşi badi şǩala him ǩoçi ti do ťani doburagaditu bogzalit.
Ma-ti tişa na-momixťupe dobusinapi do ma-ti bigzali.

Oǩorobu : Mecit Çakirusta

 

 

İsmail BUCAKLİŞİ

Son Güncelleme: Perşembe, 12 Nisan 2012 11:40

Helimişi XASANİ

Helimisi
Lazcanın Evrensel Şairi

Coxope

Coxope
Çocuklara Lazca İsim

93 Harbi

93 Harbi
Muhacir Lazlar

Arkeopolis

Arkeopolis
Lazika'nın Başşehri

Lazca Açıköğretim

Lazca Açıköğretim
Açıköğretim Başlıyor