Thu08242017

Last update06:26:30 PM GMT

Font Size

Profile

Menu Style

Cpanel

Ali Dai Doğuru, Oxori Meğuru…

  • PDF

alidaidoguru1

Jindo dolovoǯeri do pʒadi-çi ǩoçepek usťa şǩala otva eçves do cayoneran. Oxorişi jilenǩale serende-muşi keludgun msǩva msǩva: Hişo umiteli sťeri. Him serende-çi ǩoca golayonaşi oşǩomale hik moyǩaçeťu.

Gurban bayramis çoişe milvapuťu. Ṕandaneri sťeri aviyas elapxer do vimjoramťişa bozomotalepek miyoxes.“Mele Ali Daişi oxori ǩoǩoxuman”-ya miǯves. “Muya! Him ḉira sťeri oxoris muya anǩvaran!”-ma do a kogamaviǩiyi do moǯovuǩaṕi. Hiǩu beťi mayu, hiǩu beťi mayu-çi nʒa cexťu do dudis kogoyomadu. A vaǩiťi şuǩale xolo dudi-şǩimi şǩala ṕťǩvi-çi encami oxori ǩoǩoxuman, bare golafťa do ar jur fotorafi kogamavuğa. Maçina vicibali, eǩna oğişe ceşǩoreri lasťixepes cevoṕazgi do kogolafťi.
Jindo dolovoǯeri do pʒadi-çi ǩoçepek usťa şǩala otva eçves do cayoneran. Oxorişi jilenǩale serende-muşi keludgun msǩva msǩva: Hişo umiteli sťeri. Him serende-çi ǩoca golayonaşi oşǩomale hik moyǩaçeťu. Mis muya na-ayasere ezdaloni, “E berepe, ham Ali Daişi serendeşe keviğat, hik mutite mtucis va eyalen.”-ya iťuťes. Ali Dai na-viťur hisťeri hasťeri ar ǩoçi var on. Ham dunyaşi malzeme himus uğuťu. Mis muya na-dvaḉiren himu eǩnas dvantxeťu. Burḉuli, arguni, nçai oraği, ḉivi, balyozi, ǩantari, sťiribi, sǩeṕali, ḉaǩuḉi, ǩaṕiǯi, sağani, ťiğani… İri tevuli onʒxenis cužuťu. Oxori-ti mʒika mʒukuşi var on, muǩu nusa, muǩu nusava iri ar svas dogutuťes. Sotini musafirepe-ti hik moyǩaçeťes. Hisťeri oxori-çi naşǩvi doloxvalu, ǩoçi oʒadute va ižğen. ǯalenǩale piʒarişe, jilenǩalemu ǩaraťaşişe xinaperi, ǯulu ǯulu pencerepete.
Nana-şǩimis, “Nana, himisťeri oxori ǩoǩixven-i?” –ma do mevandvis, “Muya an e mudara, esǩi çeremiťape iri doťroxu, dipiʒxolu, ṕanda comḉims. Tude va dvaxuneran. Piʒari na-ono ǯaleni ťarafis mtucepe izuvaleran. Oxoris muti va dogadvas a çare užirare da…” -ya miǯu ama komişǩun-çi himus şǩiminde opşa guri adu. Çunçi oxori nana-şǩimişi alan orťu. Ali Daik ṕanda uǯomerťu, “Si na-dirini ǯanas cevoḉit” –ya do.
Nana-şǩimik mtuci miǯus cevoǩitxi, “Mtuci evelis-ti iyeťu. Hindos muya ikumťes?” –ma do. Nanak, “Var iyen-i? Naǩu na-ťǩvare da, ama Ali Daik ǩaťu şinaxumťu. Opşa msǩva ǩaťupe ayeťu. Ǩaťu na-ono svas mtuci va amvalen” -ya miǯu do nayonu “Hem-ti Ali Dai, opşa titiz orťu. Gale doloxe-mu çumťu. Him şurite orťuşa oxoris ar ťiǩi va comḉimťu.” Ha, hindos ṕťǩvi-çi, “Ali Dai doğuru, oxori meğuru!” İri tevuli himuk ikumťu. Ğuruťuşa iri tevuli dutembiğu, toli eyutuşa oxoris nozmoťu.
Hani viduşunamťişa nana-şǩimik bere vorťiťşe ndoni nana miǯomeťu a mutxa kogomaşinu: “Ğurerepek xafťa (çaçxa) serepes oxori-nişişe muluran do moygoraman. Hinik şǩu mžireman do şǩu hini va bžiremt.” –ya do. Hindos ṕťǩvi-çi Ali Dai-ti ǩaťa xafťa seris mulun. Ham xafťas-ti moxťasere do jindo doloǯerasere. ʒadasere-çi oxori-muşi doloxves. Hindos ṕanda na-ikumťu sťeri xes na-oǩaçun burḉuli leťas contxasere do soti na-on ogorapupe svarasere.

Eça Ali Dai!
Şǩimi ogorapu oxvaminu on…
Ali Dai, hisťeri a Ali Dai orťu-çi a mitxak xuçe komuyonu-i mi orťasere orťas, yeǩťen ogorams. Çois cegaperi na-oran şeni xavi va ayeran, irik diʒaman. Ali Daik ar ndğas yema namazi asere. Oxori oği goynžiǩu xepepe do abdezi eḉopamťuşa melendo opşa na-eyureťu a ǩoçi gamalu. Ali Daik nḉara naşǩu do kocoḉu ogorapu-çi celaxunas na-celaxeťes berepek “Aha! Ali Dai, muya ikum, igoram!”-ya uǯves. Hindos Ali Daik dudi golaktu do “Naşǩvit” -ya, “Şǩimi ogorapu-ti oxvaminu on!”

 

Not: Bu yazının Türkçesi için "Ali Dayı öldü, ocak yıkıldı…" adlı makaleye bakabilirsiniz.

 

Filiz HOCAOĞLU

Son Güncelleme: Salı, 03 Nisan 2012 08:15

Helimişi XASANİ

Helimisi
Lazcanın Evrensel Şairi

Coxope

Coxope
Çocuklara Lazca İsim

93 Harbi

93 Harbi
Muhacir Lazlar

Arkeopolis

Arkeopolis
Lazika'nın Başşehri

Lazca Açıköğretim

Lazca Açıköğretim
Açıköğretim Başlıyor