Thu08242017

Last update06:26:30 PM GMT

Font Size

Profile

Menu Style

Cpanel

Na domoxvanen sva

  • PDF

T̆ilifoni şǩimi iç̌andinusi İstanboli vort̆i. T̆aroni mǯupi’rt̆u daha. Ora va tanu dort̆u. Numera xate gamoviyoni. Şǩuni oxorişi numera’rt̆u. Oncire keviseli do t̆ilifoni gomǯi. ǯulu eksalepe şǩimi’rt̆u. Himu şǩala na-va bisinapi naǩu ǯana iyu dort̆u mara nena viçini.
‘Amet abi si or-i?
Ma Exa… Miçini-yi?’ya tku.
‘Ma vore ho. Giçini… Mu xali giğunan Exa, xoşi p̌at̆i mutxa var iyu? Xeyir’on!’
Guri şǩimi oxizdert̆u. Ar mutu iyu; ar mitxa doğuru, mara ma na-mevozmor nana do baba şǩimi… çoi şǩimişa na-va milvapun mondo xuti ǯana diyu dort̆u. Didi cuma şǩimi şǩala oǩoşireri vort̆i. Ar mt̆ǩo let̆a şeni, guri momiyonu dort̆u. Baba şǩimi do nana şǩimi himuşi ǩale na iyes şeni ma-ti gamaft̆i vigzali dort̆u.
Neǩna-ti dobragadi. Him oraşen beri Art̆aşeni çoyi şǩimişa va vidi… Exaşi nena tutxu mulurt̆u. Uci gonǯeri vişǩini.
‘Amet abi, nosadi şǩimi ar t̆ilifoni doyi ya miǯu, ma. Mutxalepe giǯvasen. Him mekçam.’

Nosadi muşi, nana şǩimi’rt̆u. Dida nana şǩimi. Toli çilambri na-va ǩoǯvalen nana şǩimi… Ar bet̆i ǯana diyu dort̆u him na-var mevancudi. Soğuni, goǯo moxtesu şǩimda, İstanbolişa. Baba şǩimi İstanboli dolikaçamt̆u mara bereşi oropa, daha didi mulurt̆u.
‘Amet…’ya tku nç̌ineri nenate nana şǩimi. ‘Amedi e çona!’

Beronaşen doni hişote miyoxamt̆u nana şǩimik.

‘Nana! E nana şǩimi, nena sǩani bgarineri mulun! Muya gağodu? Haǩu ç̌umanis moy mixenitu?’-ma vuǯvişi guri, tolepe şǩimi çilambrepe opşu.

Him oras na viduşuni mutxa; ma hay mu duyla miğurt̆u, nana do baba şǩimişa mendrale, Lazuri svalepeşa mendrale, na devirini let̆apeşa mendrale, mu duyla miğurt̆u!…

‘Amed, toliçona, baba sǩani …’xvala azit̆u nana şǩimi.

Obgaru kocoç̌u. Bet̆i mutxalepe tkvasert̆u mara guri va naşǩumt̆u. Ar naşǩuǩo…

‘Nana, mu iyu nana? Mo ibgar! Zabun’on-i baba şǩimi?’

‘Sum ndğaşan beri oncire ncay. T̆oxt̆ori-ti koʒadu. Zat̆i zabuni ort̆u, kogişǩun. Purpupe (cigerepe) dukʒu ya t̆oxt̆ori. Şuri var azden. Amed, aşǩva mç̌eşumt Amed…’ Mç̌eşumt…Mu mç̌eşumt̆es? Baba şǩimişi ğura mç̌eşumtes-i? Nana şǩimi t̆ilifoni Exa komeçu dort̆u. Na-var naşǩumt̆u guri, osinapu var oxenapamt̆u nana şǩimi.

‘Exa’ -ma ‘baba şǩimi muç̌’on?’ -ma vuǯvi.

‘Amed abi, cumadi şǩimi rosi var on. Ğomaşan doni toli va gonǯu. Ğoma gonǯusi si giyoxu!’

‘Ma munde miǯvatert̆u Exa? Baba şǩimi ğurun do munde miǯvatert̆u?’

‘Ğoma limci gixenatert̆u mara hay oxori telaşite gomoç̌ondres. Nosadi şǩimi ora tanaşa var inciru. Miyoxu t̆ilifoni dop̌a ya do.’

‘Mevulur Exa. Nana şǩimi hişo uǯvi. Bere sǩani nulun, -şo. Andğa uçağite meft̆ar.’

T̆ilifoni cemǩoli. Çili şǩimi ma mişǩirt̆u. Na vibgart̆i azirert̆u. Ali kodolomabu şǩule:

‘Nana do baba sǩani’nan! İdi! Aşǩva guri moyononi ora var on!’ -ya tku.

Mani mani dobixaziri. Uçaği bilet̆i kep̌ç̌opi. Ondğerişa T̆amt̆ra koceft̆i. Hekolendo-ti Art̆aşeni… Xuti ǯana şǩule Art̆aşeni vort̆i. Minibusite çoi şǩimişa keşǩaft̆i. Ora, Lazuri svalepe ordo içodert̆u. Çoi keşǩaft̆işi limcineri mjora oxori şǩuni cedumt̆u. Mzaxali şǩimi ali kodolovabi. Didi cuma şǩimi neǩna norert̆u. Tolepe pşeri, dudi cğoneri… Hiçi muti var ptkvişa he-muşe vidi.

‘Abi!’ma ptkvi şǩule xe kovaǩni. Himu-ti ma ali kodolomabu.

‘Na golaxt̆u, golaxt̆u Amed...’ -ya tku, hiǩu xvala.

Oxori serapa (ǩalabaluği) ort̆u. Ar mitxaşi oğuru omç̌eşu, dido p̌at̆i mutxa na-on himdora vogni dort̆u. Cuma şǩimi, ndalepe şǩimi, eksalepe, cumadi, xisimepe şǩuni. Mtelik mç̌eşumtes baba şǩimişi ğura…Nena var ikumt̆aşa…Nana şǩimi, baba şǩimi na ncart̆u odaşi neǩna norert̆u. Ar ç̌ut̆a ǩulina doxuneri doloxe na-on xocaşi yasini işǩirt̆u. Mazirusi bere steri keyiselu.

‘Amedi şǩimi komoxt̆u!’ -ya tku.

Ali, çilambri ceyoneri kodolomabu. Xarayepe komevancudi.

‘E nana şǩimi, mute giǯva ham opişmanu şǩimi?’

‘Ma muti mo miǯomer aşǩva. Si moxti, -ya, hamuşa gale muti va bgorum ham kiana.’

Nam ora şǩule xoca gamaxt̆u. Nana şǩimi xe ǩlimeri odaşa kamomiyonu. Baba şǩimi oncire ncart̆u. Tolepe dveri. Nana şǩimi do ma vort̆it oda. Neǩna cemǩolit̆u. Çona gomǯi ma. Baba şǩimişe mendaft̆it. Tkvarot̆i (sançi) ar hiǩu daha dibadu dort̆u. Şuri moyizdamt̆uyi va moyizdamt̆uyi var ignapet̆u. Juri xepe muşi, eyorçaleşi gale, şǩa medverirt̆u. Tkvarot̆i doğuru do çefini dolonkunanert̆u. T̆obaşa mamgarinu. Nana şǩimi ǯulu boyinate ǩoçi muşişa mondruǩu do, ‘Biçi sǩani komoxt̆u Cemil! Vorsite moxti va uǯvar-i?’ -ya uǯu. 

P̌ri t̆ǩu baba şǩimi tolepe gonǯu. Tamo tamo mara gonǯu. Jindoşi ʒadu. Nana şǩimi xe maǩnu şǩule moyizdu. Huy tolepes moǯert̆u baba şǩimik. Mu şeni vap̌p̌a mişǩun mara oncğore mayert̆u. Xuti ǯana na-va moft̆i şeni, p̌anda nana do baba şǩimi t̆ilifoni va vuyi şeni beçiti…

‘Amed!’ya tku.

Hiǩuşi…Tolepe xolo cenǩolu. Tkvarot̆i ar mutxa mç̌eşumt̆u. Şǩimda na ognasert̆u ar mutxa…Tolepe xolo gonǯu. Nana şǩimi ofidepe dusvaru…Xarayepe xe celissu komoci muşişi…

‘Baba!’ -ma; ‘Komoft̆i… Sǩani şeni komoft̆i baba… ǯulu biç̌i sǩani muti va tkvar-i?’

Tolepe gonǯumt̆aşa şuri ç̌irdumt̆u.

‘Didi cuma sǩani şǩala dicezadit-i!’ -ya tku xvala.

Tolepe şǩimişi çilambri nana şǩimi, mç̌ita mandili muşite kosamt̆u. Baba şǩimi, ğururt̆aşa bile berepe muşi nozmot̆u.

‘Ho!’ -ma vuǯvi, ‘Dovibarişit…’

Mancurani osinapu, tolepe cenǩolerirt̆u.

‘Hust̆i şǩule guri moyonu var iyasen Amed. Si hay na aoroper, Lazuri svalepe na aoroper komişǩun. Nusa şǩimi, montalinape şǩimi keç̌opi…’

Doxvalu… Nana şǩimi çarbepe muşi doǯaru. Himdora şǩule osinapus konayonu:

‘Montalinape şǩimi keç̌opi komoxt̆itu. Haninepe, tkvani’n… Lazuri let̆ape tkvani’n… Tkva-ti idati, mi sǩudasen…Si ham xvala gigor Amed… P̌anda nana sǩani şǩala ort̆it. Aroğorda…’ -ya tku.

Başǩa-ti muti va tku. Tolepe ar daha-ti va gonǯu. Ma, him oras vogni ‘şǩimi na onpeşi oropa muç̌o iyen…’

Şǩimi bgarineri, xareyepe celasveri komoci muşi nancurt̆aşa; let̆a-şǩimişa mendrale va bğurare –ma do sozi komepçi dort̆u.

Na domoxvanen sva-ti, Lazuri let̆ape iyasert̆u.


Murat Ercan

Helimişi XASANİ

Helimisi
Lazcanın Evrensel Şairi

Coxope

Coxope
Çocuklara Lazca İsim

93 Harbi

93 Harbi
Muhacir Lazlar

Arkeopolis

Arkeopolis
Lazika'nın Başşehri

Lazca Açıköğretim

Lazca Açıköğretim
Açıköğretim Başlıyor