Wed06282017

Last update06:26:30 PM GMT

Font Size

Profile

Menu Style

Cpanel

Mcve Oxori Çkini

  • PDF

Ağani oxorişi oǩidu şeni na-p̌ǯǩit mcveşi oxori çkini P̌ap̌uli çkimik ǩidupt̆uşi maarani oǩoǩidinu (cihan harbi) kagamaxteen do kyoi çkini-ti ʒ-4 ǯanas Urusiş askerepeş xes kodololeen. Edo oxori şeni xazireli na-ren piʒarepe em askerepek var ç̌vanten p̌ap̌ulik dişka tiyeleen do oput̆es koǩobğeen.

Mcveş oxorişi galeni neǩna na-gonǯǩa ǩala ğocişa kamilet̆u. Ğocişi maržgvani ǩele Dizgyaiş (Tezgah) oda, ǩvazali ǩele-ti jini ǩat̆işa na yilen ar piʒariş ǩvata do ǯoxlendo-ti ogyareşa na-amilen ar neǩna çkva kort̆u. Ogyareşa amaxtaşi-ti xolo maržgvani ǩele ç̌it̆a oda, ǩvazali ǩele ǩeremuli na-goǯobun ar ocakluği (şç̌mine) do Dinanaş oda, ǯoxlendo ǩele-ti, ekoleni oput̆eşa na-gamilen neǩna kort̆u. Jini ǩat̆is-ti Muşiri do man na-bcant odaşi maržgvani ǩele ar ǩoridoi do ekole akole-ti mcveş oda do ağani oda kort̆es. Mcveşi odas iya aya molobğut̆u do ağani odas-ti nana do baba cant̆es.

Dizgyaiş odas babaşi xe muşiten noxvene ar torna uğut̆u do çarǩi muşi ǩuçxeten oktapt̆u. Babak ek mamç̌ǩadoba (marangozoba) ǩala mobilya-ti ikipt̆u do çkinti emus mevuşvelt̆it. Çkin em oxori 1948’is p̌ǯǩitşi man daha nçxoro ǯaneri vort̆i mara xerxi do laşungi (kesei) ǩala burç̌uli do çkva mutupe birtum xes komokaçut̆u. Çkin osteru şeni piʒarepeşi ǩunʒulişen mexerxeri t̆aǩope domibağut̆es. Majurani berepes eti var uğut̆es. Ogyares ǩeremulis birtum ar ǩardala kogoǯobut̆u do emus birtum ya lobiya varna luqu igibet̆u. “Yonç̌i luqu, gyonç̌i lobiya!” na-zop̌onan steri. Kimi oras ont̆ules na-mep̌ǯilat kuvaliş lobiyape t̆ağaniten dopxraǩup̌t̆it do cebes kodolovibğapt̆it. Gale vort̆atşi en ǩai gyari iya maqvet̆es. Kimi oras-ti ağani lobiyaşi ǩaǩape t̆uʒa mt̆veris meşovoxvapt̆it do dopşuşkupt̆it. E-ti dido nostoneri iqvet̆u.

Babak daçxiriş ǯoxle ar mçxuriş posti konorçapt̆u do ek doxedat̆uşi-ti Muşiri ǩala p̌odia muşis gelaxunu şeni yarişi vikipt̆it. Babak raxat̆oba şeni gaziş lamba toǩiten nç̌eris na noç̌ǩadu ar maǩaraten yonç̌ap̌t̆u, gyonç̌ap̌t̆u. Lambaş tude na ren postis doxunuş yeri kobžiratşi-ti babak ǯoxle musafi diǩitxupt̆u do oǩule-ti çkini ǩala zikri ikipt̆u. Seriş gverdis dulya na varixvenen şeni ora meǩolapuşi en ǩai gza-ti iya miğut̆es.

Majurani didi oǩoǩidinus (cihan xarbis) iri şeri ǩala şekei, lazut̆i do ǩazyaği-ti keç̌ǩoduşi lambaş yerine ǩandili vixmart̆it. Ǩandili şeni margvali ar tenekeş ǩuti do jin muşi-ti ar çarǩiten em ǩutis na doložin fit̆ili eşovonç̌apt̆it. Fit̆ili na bzop̌on-ti mu ren! Mcveşi paç̌avrape şeridi steri dopxarupt̆it, domç̌imoşupt̆it do lukuna kogovusumert̆it. Ǩandili na bzop̌on; ar ǩuti, ar fit̆ili do arçkva na gilunçaxa ebzaşi daçxiri. Mteli iya ren işte.

Kyois mitik soba yado mutu na vaixmart̆u şeni qinobaşi ndğalepes-ti limcişi ordo xolo onceres komeşavit̆it do ǩuçxepeşi ot̆ibinu şeni Muşiri ǩala ǩuçxepe artikartiş xais komeşavudumert̆it. Ǩuçxe qini giğut̆aşi nciri mulun-i? Helbetteki var mulun. Edo ncirişi moxtimuşakis artikartis p̌arametepe vuǯumert̆it. Kimi oras çkin-ti kelavumʒxupt̆it. Kimi oras-ti na minonan steri dovoçodinapt̆it. Ǩarta seris ayni p̌arametepeten mep̌ç̌irdat̆itşi-ti onceres meşaxuneis vibirt̆it. Edo eşopeten oǩondruǩeri kodomanciret̆es.

Oxorişi ǩap̌ulas bağu midgit̆es. Çeçme-ti oput̆eşi majura ǩele uşkiriş kinais eladgit̆u. Oput̆e dido didi var t̆u-tina dolokunu do kyume steri oxominuş mutupe ek na gonžin ar nçxilis mujiǩidet̆u do ixominet̆u. Edo çkin iri osterupe-ti em ç̌it̆a oput̆es vikipt̆it. Ar ǩele-ti zambağepe golorgut̆u. Gzaş ǩele-ti ar mjoli kogedgit̆u do pukirobas emuşi but̆ǩape met̆aksiş munt̆uris pçapt̆it. Met̆aksiş munt̆urişi markvalepe mjoliş but̆ǩapes gevobğapt̆it. Markvalişen gamaxtanşi but̆ǩape ar şvacis kagondinup̌t̆es. Dirdan do kukudas komeşaxedanşi-ti berepes gyunaxi var aqven ya miǯumert̆es do ǩardalapes natxialaps ǯǩaris kodolomobğapapt̆es. 

Oki kogomaşines, emuşi-ti doptkvat.


Yımaz Munir Avcı

Helimişi XASANİ

Helimisi
Lazcanın Evrensel Şairi

Coxope

Coxope
Çocuklara Lazca İsim

93 Harbi

93 Harbi
Muhacir Lazlar

Arkeopolis

Arkeopolis
Lazika'nın Başşehri

Lazca Açıköğretim

Lazca Açıköğretim
Açıköğretim Başlıyor